Сперм-ботовите им помагаат на сперматозоидите [ВИДЕО]

Истражувачи од Германија измислија начин како да се употребат микро роботи што ќе им помогнат на сперматозоидите да пливаат побрзо и поефикасно

Една од најчестите причини за неплодност кај мажите е слабата подвижност на сперматозоидите. Сперматозоидите се присутни и живи, но не се доволно подвижни и брзи за да стигнат до јајце-клетката и да ја оплодат. Германските истражувачи работат врз можното решение на овој проблем. Видеото објавено од страна на Американското хемиско здружение – American Chemical Society го прикажува вистинското влијание што овие новооткриени микро бионички наметки за сперматозоидите, може да го имаат врз двојките кои имаат проблеми со зачнувањето.

Поттикнати од поранешните истражувања врз микро моторите, научниците ги создале сперм-ботовите.

Истражувањето било предводено од професорот Оливер Шмид – Oliver Schmidt од „Leibniz Institute for Solid State and Materials Research Dresden“. Тие претставуваат минијатурни метални спирали, доволно големи за целосно да го обиколат опашот од сперматозоидот и успешно да го одведат кон јајцето. Овие микро мотори употребуваат ротирачко магнетно поле. 

Според новото научно истражување од зборникот „Nano Letters“ објавено овој месец, научниците откриле дека биле во можност да ги контролираат овие микро бионички пливачи во петриев сад со помош на магнетно поле.

Секако дека успехот во лабораториски сад не е еквивалентен со успехот во човечково тело, но сепак ова откритие врз кое треба уште да се работи, дава многу надеж за многу парови кои не можат да имаат деца.

Моментално кај случаите на неплодност поради слабо подвижна сперма се врши вештачко осеменување или ин витро оплодување, процедури кои се скапи и кои се успешни со стапка помала од 30%, според британските владини статистики. Истражувачите велат дека сèуште треба доста да работат врз овој пронајдок и не се сигурни кога истиот ќе бидат подготвени да го тестираат по клинички пат.