Синдромот Венди често се поврзува со синдромот Петар Пан и е конципиран од истиот психоаналитичар Дан Кили
Жените кои што го имаат синдромот Венди целосно се посветени на грижа на другите, на семејството, сопругот и децата, а притоа целосно се запуштаат и не водат грижа за себеси. Проблемот настанува тргнувајќи од тоа дека за соодветно да се грижиме за оние што ги сакаме, треба најпрво да се грижиме и да се сакаме себеси. Доколку овој однос се наруши, тој може да го наруши физичкото и менталното здравје.
Името на овој синдром доаѓа од детската книга „Петар Пан“ од шкотскиот писател Бари, а синдромот е востановен и развиен од психоаналитичарот Дан Кили – Dan Kiley. Венди е пријателката на Петар Пан, онаа која што се грижи за сè. Во најголем број случаи, овие жени се во врски со неодговорни мажи, кои што одбиваат да пораснат, или пак, жени кои што од премногу љубов, буквално го посветуваат животот на луѓето што ги сакаат, притоа губејќи ја самодовербата и почитта кон себе.
Карактеристики на жени кои што го имаат овој синдром:
- Чувствуваат постојана потреба да овозможат нега и грижа за другите, бидејќи сметаат дека на тој начин ќе ги усреќат;
- Ги жртвуваат своите желби за сметка на другите;
- Немаат свое мислење и став;
- Својата сигурност ја базираат врз потврда од другите;
- Многу им е важно да остават добар впечаток на околината;
- Тие се во постојан страв дека ќе бидат оставени сами тогаш кога нема да бидат потребни.
Најчесто однесување на жените со овој синдром: Одбивање дека имаат проблем, мислат дека нивните мажи буквално не можат да опстанат без нив, посесивни се, постојано се жалат, чувствуваат постојана грижа на совест. Жените кои што патат од овој синдром најчесто од жртви брзо преминуваат во жени кои што сакаат да ги казнат своите мажи (трошат пари на нешта што не им требаат, стануваат хипохондрици и бараат од мажите постојано да ги носат на прегледи, одбиваат интимни односи и слично).
За да воспостават психички баланс, оние кои што патат од овој синдром, треба да создадат свест за својата состојба и доколку мислат дека не можат самите да се справат со проблемот, да побараат помош од стручно лице.
