Петар Пан е синдром кој ги зафаќа повеќе мажите околу триесеттата година од животот
Петар Пан синдромот ги зафаќа оние кои што не сакаат да пораснат, одбиваат секаква одговорност и сметаат дека детството претставува идеална состојба на среќа и безгрижност. Овој синдром се забележува повеќе кај мажите отколку кај жените, a се објаснува со афектирана блокирана зрелост во периодот на детството, додека интелектот се развива нормално. Името на синдромот доаѓа од детската книга „Петар Пан“ од шкотскиот писател Бари, а синдромот е востановен и развиен од психоаналитичарот Дан Кили – Dan Kiley, кој во 1983 година ја напиша истоимената книга, со детална анализа за синдромот.
Светската здравствена организација не го признава како психолошко нарушување, но симптомите на оваа состојба се исти кај сите оние кои што одбиваат да живеат како возрасни личности. Тие симптоми се:
- Нетипично однесување кое оди во крајности (од преголема восхитеност до целосна незаинтересираност);
- Преголем гнев без видлива причина;
- Среќа која преминува во екстремна паника;
- Чувство на фрустрација која води до самосожалување и депресија;
- Имаат проблеми со искажување чувства на љубов;
- Не можат да се опуштат и да се релаксираат;
- Непредвидливи се и манипулативни.
Овие индивидуи имаат проблеми при градење стабилни врски и заради тоа се најчесто сами. Создаваат свој свет, своја верзија на Недојдија (пример за ова е Мајкл Џексон и неговиот забавен тематски парк) и не се „вистински“ возрасни, туку едноставно имитираат возрасно однесување. Не го познаваат концептот на грижа на совест и покајување, па за нивните грешки секогаш се виновни другите. Често утеха наоѓаат во алкохол и злоупотреба на дроги.
Причини кои што го предизвикуваат овој синдром: премногу заштитнички настроени родители, нарцисоидност, трауматично детство, недостаток на љубов итн.
Контролирањето на „Петар Пан “ е тешко поради негирањето на оние што патат од него. Прв чекор кон лечење е да се создаде свест за оваа состојба. Разговор со психијатар може да помогне да се открие причината за ова однесување, односно нарушување.
