Синдромот на сомничави умови е производ на популарноста на реалните шоуа
„Синдромот Труман“ е синдром востановен во поново време и претставува илузија или заблуда дека личноста се наоѓа во реално шоу и дека цела околина (луѓе, ситуации, настани) се дел од една голема претстава. Овој синдром не е официјално признат во медицинската дијагностика.
Името на синдромот доаѓа од познатиот американски филм „Шоуто на Труман“ (1998 г.), во кој ликот Труман, дознава дека е дел од големо шоу и сфаќа дека целиот негов живот е една голема режирана лага. И покрај тоа што филмот нуди филозофски интерпретации и можности за толкување, тој станува инспирација за синдром. Синдромот го конципирале браќата психијатри Џоел и Иан Голд. Всушност, концептот на животот како дел од реално шоу, го има пред овој филм и тоа во една епизода на „Зона на самракот“, како и во расказите на писателот на научна фантастика Филип Дик.
Овој синдром е еволуција на психијатриските ментални нарушувања поврзани со заблуди, како што е шизофренијата, кога заболените мислат дека постојано некој ги следи.
Труман синдромот е последица на големата присутност на реалните шоуа преку кои пациентот може лесно да се пронајде и да ги вметне во својата заблуда. Ваквата личност мисли дека постојано некој ја гледа, ја снима и нејзините постапки се коментирани од страна на публика.
