За време на породувањето жените доживуваат ненадејни промени во протокот на крвта и притисокот.
Бременоста може да предизвика стрес на срцето и циркулаторниот систем, но сепак голем број жени коишто страдаат од срцеви состојби раѓаат здрави бебиња. Всушност, многу е важно да се препознаваат симптомите и да се знаат ризиците за да се одржи здравјето на мајката и бебето, како и навремено да се реагира во случај на компликации.
Бремените жени коишто имаат некое заболување или состојба на срцето имаат потреба од постојана и посебна грижа за време на бременоста. Што е она што треба да се знае за работата на срцето и бременоста?
Како бременоста влијае на срцето?
За време на бременоста, со цел да се овозможи здрава средина во која бебето ќе може да се развива, волуменот на крвта се зголемува за 30-50%. Со други зборови, срцето пумпа повеќе крв секоја минута и срцевиот ритам се зголемува. Предпородилните болки и контракции, како и самото породување дополнително причинуваат стрес на работата на срцето. За време на породување жените доживуваат ненадејни промени во протокот на крв и притисокот. Оттука, потребни се неколку недели по породувањето за работата на срцето да се врати во состојбата во којашто била пред забременувањето.
Кои се ризиците?
Ризиците во текот на бременоста кај жените коишто имаат срцеви состојби зависат од природата и сериозноста на истите.
Проблеми со срцевиот ритам
Мали абнормалности во срцевиот ритам се чести за време на бременоста. Тие обично не предизвикуваат посериозни проблеми и не би требало да бидат загрижувачки. Доколку докторот препорача дека аритмијата треба да се третира, најверојатно на мајката ќе ѝ бидат пропишани лекови коишто таа треба да ги зема според пропишаното.
Проблеми со срцевите залистоци
Доколку жената има заболување на сцевите залистоци ризикот од компликации за време на нејзината бременост може да се зголеми. Ако срцевите залистоци не работат правилно, може да настанат проблеми со управување со зголемениот проток на крв што вообичаено се појавува во текот на бременоста.
Конгестивна срцева слабост
Конгестивната срцева слабост е состојба којашто подразбира неможност срцето да испумпа доволно крв за да ги ги задоволи потребите на телото и органите. Оттука, во текот на бременоста кај жените коишто страдаат од оваа состојба зголемувањето на волуменот на крвта може да ја влоши конгестивната срцева слабост и да предизвика компликации во бременоста.
Вродена срцева аномалија
Кај жените коишто се родени со некаква аномалија на срцето, постои поголем ризик бебето исто така да развие некој вид на срцева аномалија. Жените со срцеви аномалии, дополнително може да бидат изложени на ризична бременост и предвремено породување.
Како да се препознаат симптомите?
Срцевите болести, заболувања и аномалии треба постојано да се следат во текот на бременост. Неопходно е да се консултира медицинско лице во случај на било какви знаци или симптоми во текот на бременоста, вклучувајќи:
- Потешкотии со дишењето;
- Недостаток на здив;
- Брз или неправилен пулс;
- Болка во градите;
- Крвава кашлица или ноќна кашлица.
Како да се спречат компликации?
Доброто внимание за себе е најдобриот начин за одржувањето на здравјето и на бебето. Оттаму, во текот на бременоста е неопходно:
- Редовно да се оди на контроли и да се следат бременоста и срцевата состојба;
- Доколку се пропишани одредени лекарства, да се земаат редовно како што е пропишано;
- Да се одмора и да се избегнуваат интензивни физички активности доколку е така препорачано;
- Да се следи телесната тежина бидејќи таа е важна за растот и развојот на бебето, како и за правилната работа на срцето;
- Да се избегнуваат алкохол, цигари и наркотични супстанции.
