proletni-sezonski-alergii-kako-da-si-pomogneme_image
Споделете со пријателите!

Типични алергиски симптоми: затнат нос и чешање на носот, засилен назален секрет, кивање, кашлање, црвенило и јадеж на очите, солзење, подочници и конјуктивитис.
Пролетта со сeтa своja убавинa и будење на целиот жив свет, за жал носи и потенцирање на алергиските манифестации на респираторниот и дигестивниот систем. Пролетните алергени почнуваат да се шират од дрвјата уште во раната пролет и траат до месец мај. Поленот од тревите, кој се јавува во почетокот на летото (јуни) е силен алерген на кој се чувствителни голем број луѓе. Симптомите на алергиите продолжуваат и кон крајот на летото и почетокот на есента кога е актуелен поленот на плевелот.

„Кога алергенот ќе дојде во контакт со нашиот организам имуниот систем реагира со создавање на антитела кои го напаѓаат алергенот!

Алергија е преосетливост на нашиот имун систем на некои супстанции кои ги вдишуваме, доаѓаме во контакт со нив или ги внесуваме преку храна. Кога алергенот ќе дојде во контакт со нашиот организам имуниот систем реагира со создавање на антитела кои го напаѓаат алергенот. Антителата кои се одговорни за настанување на алергиските реакции припаѓаат на групата на имуноглобулини Е (ИгЕ). Кога тие ќе се врзат за мастоцитите, кои во изобилство ги има под површината на кожата, во носот, во очите, белите дробови и во гастроинтестиналниот тракт, како и за крвните базофилни гранулоцити, се ослободуваат силни инфламаторни материи, како што се: хистамини, простагландини и леукотриени. Овие материи доведуваат до зголемена циркулација и ширење на крвните садови, контракција на мазната мускулатура и појава на следните алергиски симптоми: затнат нос и чешање на носот, засилен назален секрет, кивање, кашлање, црвенило и јадеж на очите, солзење, подочници и конјуктивитис.

Кои се најчести причинители за сезонските алергии?

  • Генетска предодреденост;
  • Инхалаторни алергени: полен од трева и дрва, домашна прашина, микрокрлежи, животински влакна, ПМ10 и ПМ2,5 честички (аерозагадување);
  • Нутритивни алергени: конзерванси, млеко, јајца, чоколадо, јагоди итн;
  • Отров на инсекти (пчели, оси,пајаци);
  • Сончева светлина-УВ зраци (фотосензитивност).
Прочитајте:  Како да го заштитиме нашето здравје при енормно загадување

Сите овие фактори делуваат на респираторниот, дигестивниот систем и кожата, предизвикајќи промена во имунолошкиот одговор што резултира со појава на алергии. 

Како да си помогнеме при сезонските алергии?

Алергијата во суштина е неправилно функционирање на имунолошкиот систем и класичната медицина не ги лечи алергиите. Сите лекови делуваат на тој начин што ги ублажуваат симптомите на алергија преку блокирање на реакцијата на имунолошкиот систем. Затоа е важно да преземете 4 чекори за олеснување на алергиските симптоми:

  • Направете тест на што сте алергични и побарајте совет од доктор кои лекови ќе ви ги олеснат симптомите;
  • Избегнувајте  ги алергените на кои е потврдено дека се алергични:
    • Исклучете ја храната која ви пречи од менито. 
    • Престојувајте подолго во затворен простор во текот на сезоната кога цветаат растенија на чии полени сте алергични, а шетајте после дождливи денови.
    • Облеката треба да се менува и да се пере секој ден, а по секое изложување на полен  се препорачува и туширање.
    • Избегнувајте градинарски активности или вежбање на отворено во деновите кога концентрациите на полен се високи.
    • Носете очила за сонце за да ги заштите очите од поленот.
    • Држете ги прозорците во домот затворени, а посебно во автомобилот, кога концентрацијата на полен е висока.
  • Засилете го Вашиот имунитет. Редовно конзумирајте пробиотици, храна богата со витамин Ц и Д како и Цинк. Други природни зајакнувачи на имунитетот, се маслото од црно семе, маслото од семки од грејпфрут, мед, прополис, ехинацеа итн.
  • Почитувајте ја препишаната медикаментозна терапија од лекар а која најчесто се сведува на назални деконгестиви, тописки, орални или инхалаторни кортикостероиди, антихистаминици или блокатори на леукотриени.

Симптомите на алергија, особено алергискиот ринит кај најмладите не треба да се занемаруваат, за да не се доведе до појава на хроничен алергиски ринит или астма.


Споделете со пријателите!