Едно истражување покажа дека кога живееме во усогласеност со она што вистински нè поттикнува, поверојатно е да бидеме повеќе продуктивни, исполнети и енергични
Кога длабоко размислуваме што во суштина претставува успехот, секоја индивидуа би дала различен одговор. Општеството хипнотизирано поради медиумското влијание го дефинира успехот како пари и сопственост, но дали сето ова е вистински круцијално, кога не сме внатрешно исполнети? Вистинскиот успех е нешто кое треба да соодветствува со нивото на самореализација и сатисфакција искусени од страна на секој поединец на различен индивидуален начин, во личниот, но и професионалниот живот.
Тоа што за еден е успех, за друг е неуспех
Експертот за бихејвиорален развој д-р Џон Де Мартини – John DeMartini неодамна откри дека секое човечко суштество поседува уникатен сет од вредности кои играат главна улога во насочувањето на нашите однесувања и перцепцијата кон себеси. Тој дојде до заклучокот дека сите наши позитивни и негативни емоции се само повратни реакции на тоа дали живееме во или надвор од нашиот вредносен систем.
Нашите вредности се нештата коишто најмногу ни значат во животот.
Д-р Џон заклучил дека кога ние живееме надвор од ускладеноста со нашите сопствени вредности, многу поверојатно е да манифестираме зависно однесување, саботажа на самите себе, како и одолговлекувања во животот. Кога живееме во согласност со нашиот вредносен систем, сведоци сме на подобро одржување на меморијата, подобар фокус и зголемена продуктивност.
Во мозокот постои дел познат како ретикуларен активациски систем, којшто константно ги филтрира информациите според нашата хиерархија на вредности. Да земеме пример со брачен пар кој шета по улица. Доколку сопругот има висока вредност за врските, а сопругата има висока вредност за животните, мажот ќе забележи пар кој се држи за раце, а жената ќе забележи личност која се шета со куче. Креативната магија се случува кога сме создале когнитивна резонанца помеѓу нашиот свесен и несвесен ум.
Оваа резонанца исто така игра важна улога во постигнувањето на „течна состојба“, како што тоа го објаснува д-р Џон. Кога живееме надвор од своите вредности, тогаш неизбежно сме во когнитивна дисонанса, бидејќи свесниот и несвесниот ум се надвор од ускладеноста.
Нашиот мозок постојано работи согласно нашиот систем на вредности.
Креативноста игра огромна улога кога станува збор за успехот. Таа е одговорна за раѓање на нови идеи, иновации, како и за утврдување на инвентивните решенија за проблемите. Оваа карактеристика ни овозможува да размислуваме надвор од традиционалните граници и да освојуваме нови полиња и територии. Д-р Рина Кан – Rinah Khan од Универзитетот во Аризона, уште во 2012 година откри дека поверојатно е да бидеме покреативни кога не сме конзервативни, кога имаме отворен ум и сведочиме позитивно расположение. Со правење на она што вистински нè инспирира, многу поголеми се шансите да ги искусиме овие две работи.
Д-р Де Мартини исто така ги елаборираше двете главни движечки сили што ги мотивираат луѓето во својот семинар насловен „Откривачко искуство“ – The Breakthrough Experience. Тој вели дека ние сме постојано мотивирани како од инспирацијата (енг: inspiration), така и од очајот (енг: desperation). Изворот на очајот е размислувањето базирано на страв и индивидуите коишто се мотивирани од очај се во константна состојба на барање на задоволството поради болка. За нив е поверојатно да се често емоционално растроени и да се предадат кога ќе се соочат со успехот.
Кога сме вистински инспирирани од реализацијата на нашите цели, нашата перцепција се менува.
Помалку веројатно е сопствените назадувања и заостанувања да ги гледаме како падови, затоа што сме презафатени со работата и нив ги гледаме само како можности за растење, учење и усовршување. Ова е од особено значење за отстранување на ограничувачкото размислување и уверувања коишто ни се кодирани и програмирани во нашата потсвест.
Една лабораториска студија од 2010 година го потврди истово. Спроведена од страна на истражувачите „Шнел“, „Брендстатер“ и „Кнопфел“, студијата покажа дека испитаниците имале поголема веројатност да доживеат однесување ориентирано кон пристапот над техниките за избегнување, кога тие учествувале во задачи што ги инспирирале.
Со други зборови кажано, поверојатно е да се справиме со околности кога сме оптимистички настроени со главата горе, кога сме заинтересирани за она што го правиме. Исто така, поверојатно е да го замениме стравот од непознатото со љубопитнос, што му оди во прилог на процесот на учење и напредување.
Што се случува со нашиот мозок кога сме инспирирани
Кога учествуваме во интересни активности нашите мозоци произведуваат повисоки нивоа на серотонин и допамин. Овие невролошки состојки се поконцентрирани во нашите мозоци и физиологија кога сме дел од инспиративна акција. Допаминот е невротрансмитер вклучен во движењето, меморијата, задоволството, наградата и мотивацијата. Серотонинот е инволвиран во чувството на благосостојба, регулацијата на апетитот и пренесувањето на нервните импулси.
Како се создава одбивност кон работата
Кога сме вклучени во активности или работиме нешто што го перципираме како закана за нашите вредности, ние произведуваме повисоки нивоа на хормонот на стрес, кортизол и супстанцата П. Оваа супстанца е биохемиска состојка одговорна за пренесување на информациите за болка. Со текот на времето или имаме повеќе енергија или сме тотално исцрпени од она што го правиме. Токму затоа луѓето кои „се принудени“ да работат работа која ја мразат и не можат да се навикнат на неа, најчесто паѓаат во депресија и се разболуваат од бројни други психички и физички заболувања, затоа што негативните емоции најпрво влијаат на душата, а потоа се одразуваат негативно и на телото. Доколку работата воопшто не ве исполнува, најдобро е да си побарате нова.
