Секој 10-ти брачен пар глуми дека е среќен пред децата

Одржувањето на несреќен брак ги учи децата на погрешен модел на однесување 

Секој десетти брачен пар глуми дека е среќен пред децата, само заради нивната добросостојба, но со ваквото однесување родителите всушност можат да направат штета. Скоро 83 проценти од паровите ќе му дадат втора шанса на бракот и ќе се потрудат да функционира заради децата, а секој десетти пар го одложува разводот до моментот кога децата им се доволно возрасни за да можат полесно да се соочат со разводот, покажало истражувањето на интернет страницата „Хилби“ (Healbee), во кое учествувале две илјади парови.

Само пет проценти од паровите коишто планирале да се разведат откако децата ќе пораснат и ќе го напуштат домот успеале да ги решат проблемите и да останат заедно. Дури 72 проценти се изјасниле дека живеат заедно и се однесуваат како пар пред децата, иако меѓу себе се сметаат за „разделени“. Психолозите објаснуваат дека останувањето во брак само заради децата, може да се одрази негативно врз нив, бидејќи тие деца подоцна ќе го усвојат погрешниот начин на однесување и на љубов, мислејќи дека „така треба“.

„Истражувањето ни покажа дека 75 проценти од паровите коишто се развеле, велат дека сега жалат дека останале во брак заради децата а скоро 90 проценти признаваат дека ќе се раведеле многу порано доколку имале поголема поддршка“ вели Чад Шофилд од „Хилби“. Многу парови коишто сакаат да се разделат, се чувствуваат „заробени“ бидејќи немаат доволно финансиски средства да живеат сами, не можат да си дозволат развод или пак им треба повеќе време да направат конечна одлука. Тие чувствуваат дека многу ќе изгубат, се плашат како другите ќе гледаат на нив, се плашат да останат сами, итн.

Во секој случај, да се прекине брачна заедница е тешка одлука и притоа не треба да се избрзува. Така, како противтежа, на ова истражување ќе додадеме истражување со спротивен исход.  

На прашањето: Дали паровите коишто не се среќни во бракот треба да останат заедно, одговор дава и Институтот за семејни студии од САД. Неодамнешниот нивни извештај базиран на обемна студија (која траела 10 години и опфатила 10 илјади мајки со своите партнери) за тоа што се случува со несреќните парови, ги даде следниве резултати:

Пет проценти од паровите, не биле среќни во бракот откако добиле бебе. Една третина од нив се разделиле, додека од оние коишто останале заедно по овој период, само 7 проценти (од тие 5%, односно 0,3 % од вкупниот број на испитаници) биле несреќни и до периодот кога нивните деца имале 11 години. Овие резултати ги сумирале во следниве искази:

• Да се биде несреќен е многу поретка појава отколку што се мисли. Се однесува само на еден од 20 родители на бебиња;
• Да се биде несреќен, најчесто е привремено. Еден на секои 400 родители во целата студија, бил несреќен за целиот период од истражувањето

Нивниот краен заклучок е дека, повеќето луѓе коишто биле несреќни во бракот, подоцна биле среќни откако го поминале периодот на незадоволство. Исто така, оние коишто се развеле, не покажале поголемо ниво на среќа. Една постара студија го потврдува ова.