Во минатото многу од родителите користеле стаклено шише за хранење на бебето со цел да ја избегнат супстанцата Бисфенол А којашто е штетна по здравјето.
Дали да користите стаклено или пластично шише за млеко?
Многу родители се двоумат кога станува збор изборот на типот на шише со коешто ќе го хранат своето бебе. Денеска се достапни пластични и стаклени шишиња кои имаат свои предности и недостатоци. Пластичните шишиња, на пример, тежат помалку и не се лесно кршливи како стаклените шишиња. Но, сепак, тие не се долготрајни како стаклото. Во минатото многу од родителите се одлучувале за стаклено шише со цел да ја избегнат супстанцата Бисфенол А којашто се користи во производството на некои видови пластични шишиња и којашто се смета за штетна за човековото здравје.
Каков тип на цуцла да користите за шишето?
Повеќето од цуцлите на шишињата се изработени од силикон или латекс во различни форми. Исто така, цуцлите имаат различен проток кој зависи од големината на дупката на цуцлата. Пред да се одлучите за типот и големината на цуцлата препорачливо е да пробате неколку типови за да видите која најдобро ќе ја прифати вашето бебе.
Како да ги миете шишето и цуцлата?
Шишето и цуцлата треба да ги миете секојпат откако ќе ги употребите и тоа можете да го правите со средство и топла вода, рачно или во машина за перење садови. Кога стануваат збор пластичните шишиња, се препорачува рачно перење, бидејќи некои студии покажуваат дека кога пластиката е изложена на високи температури може да испушти одредени хемикалии. За стаклените шишиња, пак, повеќето експерти сметаат дека нема потреба од вриење по употребата.
Дали да користите мајчино млеко или млечна формула?
На бебето може да му давате да пие мајчино млеко или млечна формула. Доколку користите млечна формула, внимавајте да ја измешате токму онака како што пишува на етикетата. Додавањето премногу вода ја разредува формулата и ја намалува нејзината хранлива вредност, што може да предизвика ниско ниво на натриум во крвта на бебето, а тоа може да доведе до напади. Премалку вода, пак, може да ја направи формулата тешка за бебешкиот стомак и бубрезите.
Каква треба да биде температурата на млекото?
Кога станува збор идеалната температура на млекото, се препорачува да му дадете на вашето бебе шише со оладено или млако млеко или млечна формула. Доколку забележите дека повеќе сака топло млеко, затоплете го шишето со тоа што ќе го ставите да отстои во топла вода 1-2 минути, но не користете микробранова печка за затоплување на млекото. Протресете го шишето со млекото и ставете неколку капки на вашата рака за да ја проверите температурата, а потоа нахранете го вашето бебе.
Во која положба треба да го наместите вашето бебе за да ждригне?
Доколку вашето бебе има потреба за време или по хранењето да ждригне, потпрете го на вашето рамо и нежно тријте го по грбот. На овој начин бебето ќе може да ждригне и да го плукне остатокот од млекото. Не секое бебе ждригнува по секое хранење, оттука не грижете се доколку вашето бебе некогаш не ждригне. Доколку, пак, забележите дека почесто ждригнува, држете го исправено по хранењето и не си играјте со него барем 45 минути потоа.
Дали треба да го менувате типот на млечна формула?
Понекогаш кај бебињата може да се појави алергија која може да предизвика дијареа, повраќање или сува, црвена кожа. Ако го забележите ова, разговарајте со докторот за типот на млечната формула којашто ја користите. Тој ќе ви каже дали треба да ги менувате формулите и, доколку треба, како најдобро да го направите тоа. Важно е да се потенцира дека не е препорачливо да правите промени во начинот на исхрана на вашето бебе пред да се консултирате со доктор.
Колку долго може да го чувате млекото?
Млечната формула вообичаено треба да се искористи во рок од 48 часа. Ако имате мешана формула во прав, можете да ја складирате во фрижидер околу 24 часа. Доколку чувате мајчино млеко во фрижидер, употребете го во рок од 7 дена или замрзнете го. Замрзнатото мајчино млеко може да трае до 3 или 6 месеци во зависност од температурата на замрзнувачот.
