Дознајте кои се симптомите на рак на јајници, кои се причините за негово добивање, негов третман и кои се најновите истражувања
Ракот на јајници има голема стапка на смртност бидејќи тешко се открива и само околу 20 проценти од случаите се дијагностицирани пред да влезат во критична фаза. Добрата вест е дека доколку се открие рано, најголем процент од жените продолжуваат да живеат. Едно ново истражување открива дека со испитување на крв можна е рана детекција на рак на јајници. Тестот наречен ROCA, ги испитува нивоата на протеин во крвта на жената. Со овој тест на крвта се предвидува намалување на смртноста за 20 проценти.
Телото има свои механизми и начини со кои алармира, не ги игнорирајте!
Ова заболување наречено „тивок убиец“, токму заради недостатокот на симптоми и не е толку тивко, барем што се однесува до некои случаи. Откриени се, односно постојат првични показатели или симптоми кои што често се јавуваат доколку се работи за рак на јајници и кои се повторуваат секој ден или секој втор ден.
Најчестите симптоми за рак на јајници вклучуваат:
- Надуеност на стомакот;
- Проблеми со мокрење, кое е или зачестено или со тешкотија;
- Проблеми при јадење односно брзо чувство на ситост;
- Опстипација или дијареја;
- Гадење, мачнини;
- Болки во карлица или притисок на карлицата;
- Болки во стомакот;
- Вагинално крварење;
- Болки во грбот;
- Болки при сексуален однос;
- Губење на телесна тежина;
- Промени во менструалниот циклус.
Исто така, голем проблем кај овој вид на рак е дека може многу брзо да се рашири. Токму затоа, лекарите препорачуваат гинеколошки преглед кај здрави жени минимум еднаш годишно во зависност од нивниот животен стил.
Причини за добивање на рак на јајници:
BRCA1 и BRCA2 гени
Наследници на гените заслужни за рак на дојка, BRCA1 и BRCA2, односно жените со мутација на овие гени, имаат зголемен ризик за развој на рак на јајници како и рак на дојка. Според одредени истражувања, 39 проценти од жените со мутација на BRCA1 и 11 до 17 проценти од оние со BRCA2 мутација ќе развијат рак на јајници до својата седумдесетта година.
Останатите фактори поврзани со ризикот за добивање на рак на јајници вклучуваат:
- Ендометриоза;
- Дебелина;
- Рано добивање на менструација;
- Доцна менопауза.
Лекарите и научниците вложуваат големи напори за пронаоѓање на ефективен начин за рано откривање на овој вид на канцер. Областите на истражување ја вклучуваат и генетиката како превенција како и јајцеводите.
Се смета дека ракот на јајници се јавува во јајцеводите а не во јајниците, така што доколку ова мислење наполно се потврди, тогаш превенција и заштита би било нивно отстранување по пат на хируршка интервенција.
Начини да се спречи
Истражувањата покажуваат дека долгогодишното користење на апчиња за контрацепција, како и доењето можат да го намалат ризикот од ова заболување, заради помалиот број на овулации. Други истражувања покажуваат дека и раѓањето на повеќе деца исто така го намалува ризикот од рак на јајници. Никој од овие фактори не е пресуден, но добро е да се знаат. Здравиот животен стил како и редовните гинеколошки прегледи се задолжителни за сите жени. Телото секогаш има свои механизми и начини со кои алармира доколку нешто не е во ред, затоа не ги игнорирајте црвените знаменца.
