Важно е да се појадува но најважно е што се јаде за време на појадокот
Се вели дека појадокот е најважниот оброк во денот, а многу истражувања покажале дека оние што појадуваат се поздрави и повити за разлика од оние коишто немаат навика да појадуваат. Во основа, тоа најмногу се должи се фактот дека оние што појадуваат имаат и други здрави животни навики и секако, од квалитетот на појадокот.
Појадокот секаде во светот е различен а навиките во јадењето се разликуваат од една земја до друга и зависат од многу фактори, во кои голема улога има традицијата. Така, во европските земји, појадокот претежно се состои од тост, палачинки со џем или некое печиво и кафе, додека пак познатиот англиски појадок содржи јајца, сланина, грав, печурки, тост и колбаси и претставува целосен оброк. Според препораките на нутриционистите и лекарите, како и врз основа на голем број на истражувања, се смета дека најздраво појадуваат Исланѓаните. Нивниот традиционален појадок е составен од овес, поточно од овесна каша, во комбинација со кафеав шеќер, суво грозје и ореви.
Што претставува здрав појадок
Нутриционистите препорачуваат дека појадокот треба да биде изеден најдоцна два часа по будењето а здравиот појадок треба да содржи 20-35% калории од препорачаниот дневен внес. Здравиот појадок се состои од хранливи влакна, протеини и здрави масти коишто ќе ви дадат енергија и ќе ви обезбедат чувство на ситост.
Што да јадете наутро
Овес
Овесните снегулки се најпопуларниот избор за здрав појадок заради нивното брзо и едноставно приготвување. Тие најчесто се јадат со јогурт, млеко, мед и овошје. Исто така, овесот може да се јаде и како солен појадок во комбинација со тиквици, пиперки, спанаќ… Според „Индексот на ситост“ (систем на рангирање во однос на тоа колку долго ве држи сит одредена храна), создаден од австралиските истражувачи, овесот е храна број 1 при избор за појадок и на трето место на рангирање на сите видови на храна. Овесот го намалува ризикот од срцеви заболувања, содржи антиоксиданси, бета-глукан, моќен имуностимулатор, го стабилизира нивото на шеќер во крвта. Овесот ќе ве држи сити и стабилни, и ќе спречи понатамошно прејадување.
Ленено семе
Здравиот појадок треба да содржи протеини. Лененото семе се смета за многу здрава храна а две лажици ленено семе содржат 3 грама протеин и 4 грама хранливи влакна. Додајте ленено семе во утринското смути или јогурт за да го зголемите квалитетот на појадокот. Идеално одговара во комбинација со други семиња, од кои најпознат е миксот од 4 семиња: лен, сусам, сончоглед и семки од тиква. Овој микс е богат извор на здрави масти, протеини, јаглени хидрати, минерали и витамини. Лененото семе е богат извор на растворливи растителни влакна кои што овозможуваат регулирање на шеќерот во крвта и апетитот и заради нив, ќе се чувствувате сити и ќе ја зачувате енергијата подолго време во текот на денот.
Чиа семе
При појадокот, треба да внимавате на внесот на јаглехидрати, а доколку сакате вашиот појадок да има малку јаглехидрати, тогаш вашиот избор треба да биде чиа семе. Не содржи глутен и претставува вистинско богатство од омега масни киселини и тоа: омега-3, омега-9 (10%) и омега-6 (20%). Има двојно повеќе калиум од бананите и 6 пати повеќе калциум од млекото. Како да го приготвите: Измешајте ¼ шолја чиа семе и ¾ млеко, кокосово млеко или бадемово. Оставете го да отстои преку ноќ во фрижидер.
Здрав избор за појадок претставува и овошјето како и овошното смути во кое може да додадете многу семиња како и гоџи бобинки. Гоџи може да додадете и во овесните снегулки, чиа пудингот, или во муслите. Исто така, одличен извор на протеин се и јајцата, па затоа се сметаат за идеален појадок, како и јогуртот и зелениот чај.
Што да се избегнува
Јадењето на слатки печива за појадок може да доведе до прескокнување на квалитетен оброк полн со хранливи состојки, бидејќи шеќерот ќе обезбеди доволно енергија во текот на денот, но без потребните хранливи елементи. На пример, појадокот кој се состои од тост со маргарин, го покачува шеќерот во крвта и нивото на инсулин и за брзо време го враќа гладот со што го зголемува ризикот од дебелеење и срцеви заболувања. Ист е случајот и со останатите популарни избори за појадок како палачинките, вафлите и мафините, бидејќи се прават од рафиниран шеќер, во комбинација со преливи коишто содржат многу шеќер. Оваа комбинација го зголемува ризикот од дебелеење, дијабетес тип 2 и останати заболувања.
