Јаткастите плодови имаат многу здравствени придобивки
Недоволните или неточни информации може да ве лишат од вашиот обид да се храните здраво. Луѓето имаат страв од консумирање масти и за жал, сè уште е застапено мислењето дека сите масти се штетни. Сепак, овој став се менува благодарение на новите трендови во исхраната, коишто промовираат здрави оброци базирани на нетретирана свежа и сезонска храна, здрави масти, пиење смути најмалку еднаш во денот и ручек во стилот на буда-чинија. Сите овие оброци содржат јаткасти плодови (здрави масти) како задолжителен дел од нутритивниот пакет.
И ова не е случајно, бидејќи јаткастите плодови се најбогат извор на здравје. Овие плодови му се одамна познати на човештвото, тие се едни од најстарите култивирани растенија. Изобилуваат со разновидни хранливи материи: протеини, јаглехидрати, масти, цинк, железо, калциум, витамин Е, Б витамини и многу други. Нутриционистите препорачуваат да се консумираат до пет пати неделно околу една рака. Не претерувајте, бидејќи се калорични и нема да ви помогнат за подобрување на здравјето, доколку не го намалите консумирањето на храна која содржи заситени масти.
За здраво срце
Јаткастите плодови се природен извор на незаситени масни киселини (омега 3 масни киселини) и овозможуваат одржување на здравјето на кардиоваскуларниот систем. Бадемите содржат мононезаситени маснотии, а тие позитивно дејствуваат врз намалувањето на холестеролот и го намалуваат ризикот од срцевите болести. Воедно, тие ја намалуваат опасноста од настанување атеросклероза. Редовното конзумирање на ореви пак, ќе придонесе за намалување на лошиот холестерол во крвта. Лешниците содржат влакна, калциум, магнезиум, цинк, фолна киселина и биотин (витамин Б7), кој ја подобрува работата на срцето.
Против воспаленија
Јаткастите плодови, во прв ред бадемите и оревите, се богат извор на антивоспалителни здрави масти. Бадемите изобилуваат со хранливи влакна, калциум и витамин Е, додека сите јаткасти плодови изобилуваат со антиоксиданти, коишто му помагаат на телото да закрепне од воспаленија и воспалителни процеси.
За регулација на шеќерот во крвта
Бадемите, лешници и ореви се сметаат за храна со низок гликемиски индекс. Затоа се идеални за луѓето кои имаат проблеми со дијабетес. Богати се со магнезиум, кој има важна улога во регулацијата на нивото на шеќер во крвта. Исто така, тие изобилуваат со хранливи влакна кои го одржуваат стабилно нивото на шеќер, како и протеини кои што ќе ве заситат.
За слабеење
И покрај високата калориска вредност на јаткастите плодови, тие помагаат во губење на килограмите и спречување на дебелеењето. Ова се однесува на умереното консумирање на истите а за слабеење најмногу се препорачуваат бадемите. Неколку истражувања докажале дека телото не ги апсорбира сите калории од јаткастите плодови и затоа се промовираат како храна којашто слабее.
За добар сон
Јаткастите плодови се препорачуваат за лесна вечера, односно за заситување на ноќниот глад. Тие содржат триптофан, есенцијална аминокиселина која се претвора во серотонин, хормон, кој заедно со мелатонинот се од клучно значење за квалитетен сон. Мелатонинот го има најмногу во оревите.
За подобри резултати при вежбањето
Јаткастите плодови и семињата претставуваат одличен извор на храна за сите оние коишто редовно вежбаат, бидејќи во прв ред, изобилуваат со здрави масти и содржат голема количина на минерали, витамини, аминокиселини. Затоа тие се дел од секоја фитнес исхрана и нутритивен план. Доколку немате време за да направите ужина, јадете мешавина од јаткасти плодови и сушено овошје – брусница, ананас, суво грозје, бадеми и лешници.
За поголема енергија
Пред и после вежбање, наутро како дел од појадокот, на работа или пред телевизор, здравите грицки се вистинскиот избор кој не само што ќе ве засити, туку и ќе ви даде енергија. На вашето биро на работа секогаш имајте при рака здрави грицки како сушено овошје или мешавина од јаткасти плодови и сушено овошје, микс од четири вида семиња, банана и сл. Тие се голем извор на енергија, бидејќи се природен извор на магнезиум, помеѓу богатството на минерали и витамини. Магнезиумот е клучен минерал, чија улога му е да активира бројни ензими вклучени во создавање на енергијата на телото. Тој претставува неопходен минерал за целокупното здравје и виталноста на организмот. Идеална комбинација на јатките е сушеното овошје (брусница, ананас, грозје). Ваквата ужина ќе ви овозможи енергија за физичка подготвеност во текот на целиот ден.
