potrebnite-proverki-na-zdravjeto-kaj-vasite-najmili-decata
Споделете со пријателите!

Кога ќе дојдат на свет, децата стануваат вашата движечка сила. Тие зависат од вас па затоа информирајте се за нивното здравје

Грижата за децата не престанува никогаш, особено кога станува збор за нивното здравје. Постојат прегледи и испитувања кои треба да се направат почнувајќи од раѓањето па се до тинејџерските години. Најчесто станува збор за рутински проверки, но сепак навремените прегледи можат да значат многу за здравјето на вашето дете. Не заборавајте дека вашето дете зависи од вас, па грижата за вашето здравје како татко и мајка е исто така неопходна.

Новороденче

Кога бебето ќе пристигне, постојат неколку видови на испитувања што треба да се направат во првите шест недели.

Темелен преглед на новороденчето во првите 72 часа од раѓањето

Овој преглед вклучува проверка на очите, срцето, колковите и тестисите (кај машките деца). Ваквиот преглед вообичаено се извршува во болница пред да бидете пуштени дома. Не е проследен со болка и е доста значаен за рано откривање на некаков проблем. Во првите шест до осум недели ќе треба да направите уште еден ваков преглед затоа што на некои од состојбите кои вашето дете би можело да ги има им треба одредено време да се развијат.

Испитување на слухот

Испитувањето на слухот OAE test се прави во првите недели од раѓањето. Со помош на ова испитување може рано да се открие дали новороденчето има трајно губење на слухот на едното или на двете уши. Губењето на слухот влијае врз развојот на детето, па затоа навременото откривање на ваквата состојба може да придонесе за развој на говор и комуникациски вештини.

Испитување на примерок од крв

Најдобро е да се направи во првите пет дена од раѓањето, а ова испитување се прави така што се зема примерок од крв од петата на новороденчето за анализа. Примерокот ќе покаже дали вашето бебе има некоја од девет болести кои се ретки, но сериозни. Во тој случај придобивките од ова испитување се непроценливи затоа што ваквото рано испитување и соодветното третирање на болеста може значително да ја подобри понатамошната здравствена состојба на бебето.

Прочитајте:  Светска недела на доењето

Детство

Во овој период, се препорачуваат неколку тестови и испитувања.

Дијабетична ретинопатија

Ако вашето дете страда од шеќерна болест потребно е да се испита дали има дијабетична ретинопатија кога ќе наполни 12 години. Оваа болест го напаѓа видот и затоа сите деца кои имаат 12 години или повеќе и страдаат од дијабетес треба да се проверуваат секоја година.

Анемија

Вашиот лекар може да ви објасни дали е потребно да се направи ова испитување. Ако детето чувствува замор, губи свест и има тешкотии при дишењето има можност да страда од анемија. Но, како што рековме, консултациите со лекарот се многу битни. Тој може да ви препорача испитување на крвта за да ги провери црвените крвни зрнца.

Испитување на тироидната жлезда

Проблеми со тироидната жлезда кај децата често се појавуваат во периодот на пубертет. Доколку забележите дека кај детето се појавуваат симптоми кои укажуваат дека нешто не е во ред со тироидната жлезда обратете се кај вашиот лекар. Тој може да провери дали се работи за проблем со тироидната жлезда преку испитување на крвта.

Астма

По препорака на вашиот лекар, може да направите испитување ако забележите некакви симптоми кои укажуваат на оваа состојба. Астмата може да ја наруши работата на белите дробови и дишните патишта. Ако лекарот забележи дека нешто не е во ред со работата на белите дробови може да ви препорача дополнителни испитувања.

Запомнете дека консултациите со лекарот се од особено значење без разлика за каков вид на преглед или испитување станува збор.


Споделете со пријателите!