Последици од дефицит на Витамин Ц

Постојаниот недостиг од витамин Ц доведува до болеста наречена скорбут. Оваа болест е ретка, но опасна и последиците се навистина сериозни, почнувајќи од крвавења и отворени рани, па сè до губење на забите!

Витаминот Ц не може да биде создаден од страна на нашето тело и токму затоа е есенцијална компонента од секоја здрава избалансирана диета. Постојаното недоволно консумирање на овој витамин доведува до недостиг т.е. дефицит од овој витамин. Поради хроничниот дефицит од витамин Ц, новиот колаген неопходен за клеточното здравје, не може да се создава. Ова доведува многу од ткивата во организмот лесно да се оштетуваат и потешко да се регенерираат.

Симптомите на оваа болест вклучуваат крвавење на непцата и отечени непца, дамкавост на кожата и крвавење од мукозните мембрани. Дамките по кожата се најчести на бутовите и нозете и личноста најчесто е во депресија. Како што оваа болест напредува, доколку не се санира навреме, може да доведе до отворени и загноени рани, испаѓање и губење на забите, пожолтена кожа, покачена телесна температура, невропатија и конечно, смрт од искрвавување.

Всушност хемиското име на витаминот Ц (ascorbic asic односно аскорбинска киселина) доаѓа од латинското име на болеста скорбут – scorbutus.

Скорбутот во минатото била најчеста болест помеѓу пиратите, морепловците и војниците, бидејќи имале недостиг од свежа храна богата со витамин Ц, односно овошје и зеленчук, бидејќи плодовите брзо скапувале и не можеле долго време да бидат чувани во нивните складишта. Бебињата и постарите лица се најзагрозени од појава на скорбут.

Најчести симптоми од недостиг на Витамин Ц:

1. Замор – Лицата кои имаат дефицит од витамин Ц често се уморни и многу лесно се заморуваат и немаат многу енергија. Сепак, бидејќи заморот е симптом на многу болести и здравствени состојби, многу е тешко да се одреди авитаминозата на Витаминот Ц, само од овој симптом;
2. Промени во расположението – Недостигот од витамин Ц влијае врз расположението и истото го прави променливо. Иритабилноста и краткиот праг на толеранција, избувливоста, се додатни особини;
3. Губење на телесната тежина – Луѓето со преголем недостиг на витамин Ц во својот систем, може да бидат сведоци на нагли големи загуби на телесната тежина;
4. Болки во зглобовите и мускулите – Недостигот од витамин Ц ја отежнува регенерацијата на ткивата, па оттука се појавуваат овие типови на болки;
5. Модринки и потешко заздравување на рани – Оние кои немаат доволно витамин Ц во својата крв и тоа во константен подолг временски период, имаат тенденција лесно да се здобиваат со модринки и тоа дури и при минимални физички повреди. Кај нив потешко исчезнуваат модринките и раните потешко зараснуваат;
6. Проблеми со забите и непцата – Диетата богата со витамин Ц превенира многу од болестите кај забите и непцата. Недостигот предизвикува проблеми најчесто со непцата и состојба наречена скорбут, опишана погоре во текстот;
7. Сува коса и кожа – Оневозможеноста да се синтетизира колагенот, поради немање доволно витамин Ц, доведува до појава на сува кожа и коса;
8. Инфекции – Кога немаме доволно количество на витамин Ц во телото, со текот на времето опаѓа имунитетот и способноста на организмот успешно да се бори со инфекциите.

Исцедете си еден лимон или портокал или изедете една пиперка и овие симптоми и болеста скорбут, воопшто нека не ве плашат. Дознајте повеќе за препорачаното дозирање на витамин Ц и изворите на овој витамин следната недела.

Следната недела, читајте за: Дозирање и извори на витамин Ц