Придобивки од витаминот Ц

Користа од витаминот Ц е навистина голема, а негативните последици речиси и не постојат, пред сè поради тоа што овој витамин практично не може да се предозира

Експертите потврдуваат дека витаминот Ц е еден од најбезбедните и најефективни нутритивни состојки. Придобивките од витаминот Ц се многубројни, а негативните последици речиси и не постојат, пред сè поради тоа што овој витамин практично и не може да се предозира (телото го излачува вишокот). Витаминот Ц е витамин растворлив во вода. Телото се ослободува од она кое што не го користи, додека преголемата доза од овој витамин може само да предизвика моментални болки во стомакот (гастроинтестиналниот тракт) и да доведе до дијареја или повраќање.

Општо познато е дека консумирањето на витаминот Ц се препорачува кога сме настинати и за превенција на настинките. Научно контролираните студии за користењето на витаминот Ц за третирање на настинките, покажуваат дека може да помогне во редуцирање на симптомите на настинките. Со давањето на имуниот систем на една од нутритивните состојки што му се неопходни. Сепак, мора да се истакне дека студиите во овој поглед се контроверзни и сè уште не можат да докажат дека големите дози на овој витамин ја спречуваат настинката.

Човечкиот организам е зависен од овој витамин за правилен раст и развој, а исто така и за регенерација на оштетените ткива. Витаминот Ц помага во производството на колаген, помага при заздравувањето на раните, но и за одржување на забите и коските. Функционира како антиоксиданс, којшто помага да се редуцираат оштетувањата во клетките предизвикани од страна на слободните радикали. Оттука, може да помогне во превенција на многу болести. Антиоксидативните својства на овој витамин го заштитуваат ДНК-то на клетките од оштетување и од мутации.

„Витаминот Ц доби големо внимание и со добра причина. Поголемите нивоа на витамин Ц во крвта може да претставуваат идеален показател за целокупното здравје“ – вели истражувачот Марк Мојард – Mark Moyad доктор на Универзитетот во Мичиген. „Колку повеќе го истражуваме витаминот Ц, толку поголемо е нашето разбирање за тоа колку е тој разноличен во поглед на заштитата на нашето здравје, од кардиоваскуларниот систем, рак, мозочен удар, здравјето на очите и имунитетот за подолго живеење“ – истакнува д-р Марк.

Новооткриените здравствени придобивки од витаминот Ц исто така се многубројни. Витаминот Ц сè повеќе се употребува за заштита од ендотелиална дисфункција, висок крвен притисок и превенција на кардиоваскуларни заболувања. Додатните истражувања открија дека овој витамин може да биде корисен за превенција на астма, но и за поддршка на здраво ниво на шеќер во крвта кај дијабетичарите.

Антиоксидативното својство на витаминот Ц помага во превенцијата на катаракта. Леќите имаат потреба од многу витамин Ц за да им се спротивстават на сите слободни радикали. Кога има доволна количина од овој витамин во системот, тогаш многу лесно очите можат да бидат заштитени од оштетување. Астматичарите пак, имаат поголема потреба од витамин Ц поради антиоксидативното својство врз белите дробови.

Како важен фактор при продукцијата на колаген, витаминот Ц е корисен за заздравување на сите видови на рани. Започнувајќи од исеченици и гребнатинки, па сè до лекување на скршеници, изгореници, заздравување на хируршките рани – витаминот Ц помага раните да заздрават полесно и побрзо. Нанесуван надворешно, овој витамин се користи за заштита на кожата по изложеност на ултравиолетова светлива.

Следната недела читајте за: Последици од дефицит на витамин Ц