Прочитајте кои третмани се најбарани и научете како да ја негувате вашата кожа
Новите трендови во естетската дерматологија се насочени кон неинвазивните и помалку инвазивните методи, наспроти одењето „под нож“. Предностите се бројни, започнувајќи од разликата во периодот на опоравување, инвазивноста, ефективноста итн. На оваа тема, како и за многу други прашања поврзани со нега и грижа на кожата, разговаравме со д-р Искра Петровска Шешова, специјалист дерматолог од дерматолошко естетска ординација „Д-р Искра“
Каков е Вашиот став околу разликата на инвазивните и неинвазивните методи на подмладување и нега на кожа?
Како дерматолог кој веќе повеќе години ги практикува естетските дерматолошки третмани и сум нивен поддржувач, можам да кажам дека сè повеќе клиенти се определуваат за неинвазивните естетски третмани, кои од своја страна даваат брзи резултати и се комфорни за пациентите. Важно е да се напомене дека по извршената интервенција пациентите веднаш можат да се вратат на своите работни места и да продолжат со секојдневните активности. Времето на опоравување е кратко и не се применува општа анестезија, туку локална. Целиот тој комфор му дава простор на пациентот да се одлучи за вакви неинвазивни третмани кои пред сè се безбедни и ефикасни. Пациентите се задоволни дека за кратко време го добиваат саканиот резултат.
Фокусот за 2017 година е насочен кон природен младешки измазнет изглед, постигнување на измазнувачки ефект, наспроти „пумпачкиот“ ефект од 2016 (усните на Кајли Џенер, многу истакнати јаболчници, итн.). Кој е најдобриот начин за измазнета кожа без брчки?
Сè повеќе, во светот се стремат естетските третмани да овозможат што поприроден изглед, а не вештачки и наликување на пациентите еден со друг. Тоа се најновите трендови кои сè повеќе се применуваат во естетската дерматологија. Важно е третманот да е индивидуално избран во зависност од возраста на пациентот, полот, типот на кожата, дали кожата е негувана или не и моменталната состојба на кожата. Инаку, полнувањето на јаболчници и зголемувањето на усни е сè попопуларно. Но дали ќе се примени на нечие лице, зависи од повеќе фактори. Измазнувањето и бришењето на брчките, особено на горната третина на лицето (челото, околу очи, помеѓу очите) идеално се решава со примена на ботокс.
Која е разликата помеѓу ботокс и филери?
Постои голема разлика меѓу ботоксот и филери. Ботоксот е протеин добиен од бактеријата Cl.Botulinum кој доколку се аплицира во мускулот во мали разредени концентрации, го релаксира (опушта) и на тој начин ги брише брчките (динамички). Доколку имаме брчки кои се веќе формирани (статички), не е доволен само ботоксот туку и други естетски процедури. Филерите кои најчесто се употребуваат во естетските третмани содржат хијалуронска киселина (која природно ја има во нашиот организам) која се добива во форма на гел.
Најчесто се применува во состојби каде има вдлабнувања на лицевата регија, бразди, брчки веќе формирани статички), каде има губиток на масно ткиво, со цел да се надомести изгубениот волумен, потоа кај лузни од акни, зголемување на усни. Со цел да се добијат подобри резултати, идеално е комбинирање на третмани ботокс и филери. Освен со хијалуронска киселина има и други типови филери кои стимулативно дејствуваат на настанување на нов колаген и еластин, како што се производи кои содржат калциумхидроксиапатит и млечна киселина и обично се применуваат кај повозрасни пациенти.
Какво е Вашето искуство со машката грижа за изгледот на кожата и проблемите со стареењето?
Грижата за нега на кожата кај машката популација веќе можам да кажам дека е сè поголема кога се однесува на козметика и нега на кожа. Меѓутоа, популарноста на неинвазивните третмани на нашите простори, сепак е повеќе застапена кај женската популација, податок кој не значи дека нема да се промени во иднина.
Која естетска процедура е најпопуларна и најбарана кај нас?
Кај помладата популација обично доминираат третмани како: дијамантска микродермоабразија, хемиски пилинг со ниски концентрации, мезотерапија и пополнување на усни со хијалуронски филери. Кај повозрасните, доминираат третманите со филери за волуменизирање и ремоделирање на лицевата регија, врат и деколте, ботокс и мезотерапија.
Како може да се забави стареењето на кожата и дали редовната нега на кожата помага во тоа?
Стареењето можеме да го забавиме со правилна нега на кожата и соодветна исхрана. Од особена важност за правилната нега на кожата е да се почитуваат советите препорачани од страна на дерматолог. При изложување на сонце задолжително користење крем со СПФ 50, здрава исхрана богата со овошје и зеленчук, пиење течности до 2л вода во тек на еден ден.
Дали хемискиот пилинг се препорачува за чувствителна кожа?
Да, има хемиски пилинзи со ниска концентрација кои се посебно прилагодени за чувствителна кожа. Тие дејствуваат поволно на создавање на нов колаген и еластин и ги забрзуваат процесите на регенерација (обновување) на кожата.
Што мислите за природната органска козметика и дали ја препорачувате на вашите пациенти?
Секако сум поддржувач на природната органска козметика посебно како препорака за нега на кожа и како превентива после применети третмани против стареење.
На крај, дали може да ни дадете стручен совет како да ја подготвиме кожата на лицето за пролет? На што да внимаваме и што да применуваме?
Правилната нега на кожата и подготовката за првите пролетни денови е од особена важност. Во овој период е неопходно темелно и длабински да се исчисти кожата со цел да се отстранат површинските мртви клетки кој од своја страна ќе помогнат да се забрзаат регенеративните процеси на кожата. Тука ќе ги напоменеме третманите со дијамантска микродермоабразија, лесен хемиски пилинг, мезотераписки коктели (мултивитамински коктели), ботокс за измазнување на лицето од брчки, пополнувачи (филери), со цел да се пополнат деловите кои се вдлабнати и каде што недостига волумен. Користете крем со СПФ 50 со цел да го заштитиме вашето лице од предвремено стареење.
