Рецепт за пилешко кари од најдобриот готвач Џејми Оливер, прилагоден и малку изменет
Рецептот за ова кари е од Џејми Оливер. Тој користи кокосово млеко, а во овој рецепт млекото е заменето со кефир. Можете да го направите ова кари со јогурт, кисело млеко или кокосово млеко.
- 2 пилешки бели меса, без коска и кожа;
- 1 ½ – 2 шолји кефир;
- 1 голем компир, исечен на коцки;
- малку ф’стаци;
За кари сосот:
- 1 кромид;
- ½ лута чили пиперка;
- 2 – 3 чешниња лукче;
- парче свеж ѓумбир од околу 3 – 4 см;
- 1 лажица зрна коријандер;
- ½ лажиче свежо мелен црн бибер;
- ½ лажиче сол;
- 2 ловорови листа;
- ½ лажиче мелена тропска трева (lemongrass);
- 1 лажица сув власец;
- малку свеж коријандер или магдонос.
За оризот:
- 1 шолја ориз басмати;
- 1 ½ шолја вода.
(задржете го овој сооднос на ориз и вода и ако сакате да направите поголема количина ориз басмати.)
Сите состојки за кари сосот (освен ловоровите листови) сомелете ги во машина за сецкање, додадете неколку лажици од кефирот и ставете го пилешкото, исечено на крупни парчиња, да се маринира во сосот неколку часа во фрижидер. Загрејте малку масло во вок тава, ставете го компирот да се пржи кратко, па пилешкото, останатиот кефир и ловоровите листови. Намалете ја јачината на средно тивко и гответе го карито додека компирите и месото не се зготвени. Послужете го карито со ориз и посипано со ф’стаци.
Ставете ги оризот и водата во тенџере, поклопете ги со капак и ставете го тенџерето на најјако, додека водата не зоврие, потоа намалете ја јачината на ринглата на најслабо, не го тргајте капакот, за да не побегне пареата, оставете го оризот да се вари додека не ја упие целата вода и не почнат да се појавуваат дупчиња во масата ориз. Тогаш тргнете го тенџерето од шпорет и оставете го десетина минути да стои, сé уште поклопено со капак. Идеално би било доколку имате тенџере со проѕирен капак за да го надгледувате оризот без да го подигате капакот, ама ако го правите оризот во тенџере со непроѕирен капак, ѕиркајте кратко и брзо, за што помалку пареа да излезе.
* рецептите со во целост преземени од ситно сецкано
