Играта со лего-коцки докажано го подобрува детскиот развој на многу полиња
„Лего“ е водечка данска компанија којашто специјализира во секторот на производство на разнобојни пластични коцки и фигури со различни форми и големини. Лего-коцките и фигурите се создадени меѓусебно да се поврзуваат на бесконечен број начини со целта да се конструираат и реконструираат згради, куќи, возила и сл. Од основањето во 1940-те сè до денеска, компанијата „Лего“ со креацијата на коцки се стреми да придонесе во развојот на децата преку широкиот спектар на можности за игра и едукација.
Многу студии и истражувања докажуваат дека детската игра со коцки го помага и подобрува едукативниот и социјален раст кај децата, развивајќи ги нивните когнитивни способности, креативноста и тимскиот дух, способноста за решавање проблеми и соочување со предизвици, како и организацијата и координацијата во просторот.
Како лего-коцките наоѓаат примена во едукацијата? Кои се, конкретно, придобивките и позитивните влијанија кај децата? Какви вештини и способности развиваат децата преку играта со лего-коцки?
Лего-коцките ја развиваат креативноста и способноста за решавање проблеми
Психолозите препознаваат два клучни типови на проблеми – конвергентни, оние можат да бидат решени преку едно единствено решение, и дивергентни, оние што можат да бидат решени на повеќе начини. Играта со лего-коцки е дивергентна игра, бидејќи нуди огромен број на решенија на проблемите. Токму затоа оваа игра ги стимулира децата да размислуваат креативно за да најдат подобро решение за загатките со коишто се пресретнуваат. Во еден експеримент, истражувачите им дале задача на деца на предучилишна возраст да си играат со два типа на игри за решавање на конвергентни (гатанки, загатки) и дивергентни проблеми (коцки). На децата им било дадено одредено време за играње и потоа биле тестирани нивните способности за решавање проблеми. Резултатите покажале дека оние деца коишто играле со коцки полесно успеале да ги решат дивергентните проблеми. Коцките го поттикнуваат детскиот мозок активно да бара различни решенија за решавањето на проблемите.
Лего-коцките ги развиваат моторните и просторните вештини
Докажано е дека играта со лего-коцки е тесно поврзана со развојот на моторните и просторните вештини. Во едно истражување проф. Ивон Калдера која специјализира во секторот за човековиот развој ја следела играта со коцки на 51 дете на предучилишна возраст и открила дека децата коишто покажале поголем интерес и вештина во конструкцијата на фигури од коцки, исто така покажале подобри резултати на тест за просторна интелигенција. Конструкцијата на структури од коцки докажа дека ги охрабрува децата да ги визуелно да ги тестираат и подобруваат сопствените просторни и моторни способности и вештини.
Лего-коцките ги развиваат математичките вештини
Неколку истражувања спроведени во повеќе делови од светот сведочат за тесната поврзаност на играта со лего-коцки со математиката. Во зависност од тоа што лего-коцките се создадени на нивоа за да одговараат на различните возрасти од 3-4, 5-10, 11-13, 14-18 и 19-24 години, особено кај пораните возрасти е забележан значителен развој во решавањето на матемачките проблеми и задачи. Децата на предучилишна возраст, како и децата на училишна возраст коишто си играле со лего-коцките покажале значително подобри резултати во решавањето на математички проблеми од своите врсници коишто не си играле со коцки.
Лего-коцките поттикнуваат подобра комуникација и интерактивна социјализација
Играта со лего-коцки со сигурност го подобрува социјалниот аспект во животот на децата. Истражувањата покажуваат дека децата кога си играат со коцки во друштво, конструирајќи фигури и барајќи заеднички решенија, стануваат поотворени и комуникативни. Овие друштвени и тимски игри се особено важни за интровертните деца или децата со аутизам. Групното играње и конструирање со лего-коцки има позитивно влијание во развивањето на подобра комуникација и интерактивна социјализација кај децата.
Лего-коцките помагаат за зголемување на самодовербата и желбата за надградување
Интересно е како играта со лего-коцки може да ја зголеми самодовербата кај децата, како и желбата за постојано надградување. Забавниот момент во играта кога децата, следејќи ги дадените инструкции, успеваат да конструираат било каква фигура или структура е клучен за да почувствуваат успех и да бидат горди на себе. Во играта нема оцени и нема судии – постојат само креативноста, имагинацијата и рацете со кои децата од еден обичен куп коцки создаваат нешто реално. Постојаното барање решение на кој начин на ги склопат коцките кај децата ја развива желбата за надградување и снаоѓање кои резултираат со поголема самодоверба.
