Запознајте ги основните карактерни особини на интровертите, екстровертите и амбивертите
Сигурно досега многумина ве запрашале „Како би се опишале себеси?“, „Во која група на карактери на луѓе припаѓате?“, односно дали сте отворени и комуникативни, затворени и некомуникативни, или пак некаде на средината на овие екстреми? Овие поделби на човечкиот карактер се познати под термините интроверти, екстроверти и амбиверти. Што поточно значи секој од нив и каков тип на карактер подразбира?
Интроверт
Интровертите се личности коишто вообичаено се чувствуваат најдобро кога се сами. Тие се тивки, срамежливи и повлечени личности што сакаат да го поминуваат слободното време фокусирајќи се на сопствените внатрешни чувства и мисли, кои што ретко ги искажуваат. Интроверните карактери на луѓе секогаш претпочитаат да останат дома, каде што се чувствуваат најудобно и да уживаат во своите хобија и интереси, наместо да излезат за да се социјализираат и да се запознаат со нови луѓе. Луѓето кои се сметаат за интроверти вообичаено имаат многу мал круг на пријатели бидејќи се затворени личности коишто внимателно прават селекција на кого ќе му се доверат и секогаш повеќе уживаат да го поминат денот со еден пријател, отколку со голема група на луѓе.
Екстроверт
Екстровертите се личностите што во толпата се препознатливи по својата отвореност, енергичност и ентузијазам. Овие личности секогаш се подготвени за забава и за запознавање на нови луѓе. За разлика од интровертите, екстровертите кога би требало да одлучат дали би отишле на забава со пријателите или би останале дома сами, со сигурност ќе ја изберат забавата на која би имале можност да се социјализираат и да запознаат нови пријатели и да го прошират својот социјален круг. Екстровертите имаат карактерни особини што ги прават пријатни личности за дружба и забава во било која прилика и време.
Амбиверт
Помеѓу интровертите од едната страна на линијата и екстровертите од другата страна, се наоѓаат амбивертите. Се смета дека амбивертите се оние личности коишто ги поседуваат карактерните особини и на интровертите и на екстровертите и коишто во различни прилики и ситуации можат да бидат отворени или затворени личности. Амбивертите се личности кои се чувствуваат пријатно и удобно кога се со опкружени со луѓе, но и кога се сами. Во зависност од различните ситуации и мигови, тие можат да делуваат како интровертна или екстровертна личност, да бидат друштвени и социјални или пак, повлечени и срамежливи. Но сите овие особини амбивертите не ги изразуваат драстично како интровертите и екстровертите и оттука се наоѓаат на средината на линијата на типови на карактери.
