Спортските активности уште од мали нозе придонесуваат за здрав рбет
Искривувањето на рбетот е процес кој настанува најчесто кај децата уште на училишна возраст ако не и порано. Неправилно седење во училиште, тешките чанти, долго време поминувајќи на компјутерите без физички активности се причини кои доведуваат до искривување на рбетниот столб кај децата. Постојат три најчести видови на искривен рбет се сколиоза, кифоза и лордоза. Причините за нивно настанување се различни.
Сколиозата е странично искривување на рбетот. Во повеќе случаи се развива кај деца на возраст од 9 до 14 години. Најчесто е изразена кај девојчињата, речиси двојно повеќе отколку кај момчињата. Обично нема болки, едното рамо е повисоко од другото, се појавува нееднаков струк, едниот колк е понизок од другиот, ребрата се испакнати на едната страна на градниот кош. Треба да се направи контролен преглед и рентгенска снимка да се утврди до кој степен е искривувањето. Најчесто лекарите препорачуваат физикална терапија која со текот на времето го враќа рбетниот столб во нормална положба, но доколку нема резултати се прави корсет кој се носи околу телото од градниот кош се до долниот дел на рбетот кај колковите. Последен чекор за надминување на проблемот со искривувањето е хируршка интервенција.
Рбетот заболен од кифоза покажува искривување на горниот дел на грбот, давајќи изглед на грпка. Најчесто се јавува како последица од лошо држење на телото, но може да биде и вродена. Симптомите се нееднакви рамена, главата се навалува нанапред како и цврсти тетиви под коленото.
Ако кај кифозата искривувањето на рбетот е во горниот дел, кај лордозата искривувањето се забележува во долниот дел од рбетот кај колковите. Со лордозата можат да се создадат и дополнителни проблеми на телото како што се мускулната дистрофија, дисплазија на колкот и невромускуларни нарушувања.
За надминување на проблемите со искривување на рбетот експертите апелираат да се практикува редовна физичка активност, а децата уште од мали да се запишат на некој спорт како кошарка, одбојка, пливање, гимнастика. Да не се седи повеќе од 40минути во иста положба. Да се користи исхрана богата со калциум и витамин Д и правилно да се држи телото без разлика дали се седи или оди.
Дополнителни совети: кога се носи товар тој да биде поделен подеднакво во двете раце, да се внимава на тежината односно да не се оптоварува телото, при подигнување на тешки предмети треба да се искористи силата и на рацете и на нозете, да се приспособи работната површина според висина и да се спие на цврста постела.
