Играњето шах има бројни придобивки за децата односно за функционирањето на нивниот мозок
Шахот е одлична вежба за умот бидејќи помага за развивање на ментални способности кои се многу потребни за нормално функционирање. Шахот ја подобрува концентрација, поттикнува на критичко размислување, апстрактно поимање на нештата, способност за решавање на проблеми, стратешко планирање и анализирање. Исто така, играњето шах ја поттикнува креативноста што е многу важна за детскиот мозок. Учењето по пат на игра не се заборава, а воедно претставува забава за детето. Вашето дете не треба да биде Гари Каспаров, но доколку го научите на основните правила на шахот, ќе го поттикнете развојот на детскиот мозок.
Го поттикнува критичкото размислување
Иако исказот изгледа очигледен, ова тврдење е поткрепено со истражувањето на д-р Роберт Фергусон – Dr. Robert Ferguson. Тоа покажало дека децата од 7 до 9 одделение кои што започнале со играње шах, при извршување на задачите поврзани со проценка и критично размислување, покажале подобри резултати за 17 проценти повеќе од останатите деца во групата.
Шахот учи на логика и ефикасност
Шахот подразбира планирање на потези, односно поврзување на точки, за што е потребно логичко промислување. Природата на играта подразбира натпреварување со противник кој има иста цел, па затоа е потребно брзо размислување и пронаоѓање на наједноставен начин за да се реши комплексен проблем. Овие активности значително ја подобруваат ефикасноста при извршување на дадените задачи.
Ја подобрува емоционалната интелигенција
И покрај тоа што шахот првенствено значи пресметки и логика, важно е да се разбере дека тој е игра за двајца. Добар шахист знае да направи добра проценка на противникот, односно тој поседува солидни психолошки и социјални вештини.
Учи за постоењето на последица
Играњето шах подразбира решавање на проблеми по пат на планирање на потезите, бидејќи секој потег треба да води кон зацртаната цел. Нешто што е многу важно за детскиот развој и воспитување, е бидејќи шахот учи дека секоја постапка има своја последица. Доколку се игра добро, тоа значи победа, а доколку се игра лошо, тоа доведува до загуба.
