Десеттиот месец од годината е месецот на подигнување на свеста за ракот на дојка, кој се одбележува на светско рамниште секоја година
Додека многумина сметаат дека се доволно свесни за овој тип на рак, многумина исто така забораваат да ги преземат соодветните чекори и планот за дејствување за навремено откривање на оваа болест во нејзините најрани фази. Многумина исто така забораваат да ги поттикнат другите да го сторат истото. Интернационалниот месец за подигањето на свеста околу ракот на дојка е шанса за информирање околу нужноста за рано детектирање на рак на дојка.
Токму затоа секоја година овој месец е посветен на разновидни кампањи организирани од страна на здруженијата кои се занимаваат со оваа тематика и тоа конкретно за: информирање околу болеста, раното откривање, дијагнозата, фазите на болеста, типовите на рак на дојка, начините на лекување, митовите и фактите околу ова заболување. Исто така, многу од таквите здруженија ширум светот организираат бесплатни прегледи и слични активности кои го намалуваат ризикот од појава на оваа болест, односно раното откривање и со самото тоа потсетуваат на оваа важна превентивна практика.
Мажите се позагрозени од жените!
Сите луѓе, без оглед на полот, се родени со клетки и ткива на дојка во своето тело. И покрај тоа што кај мажите не се развиваат млечните жлезди и нивните гради се помали од нашите, клетките и ткивата во дојките кај мажите можат да развијат канцер. Ракот на дојка е навистина ретка појава. Помалку од еден процент од сите случаи на рак на дојка се појавуваат кај мажи и само еден од илјада мажи ќе биде дијагностициран од ова заболување.
[interaction id=”560a4c85c70ac51c03a96fe5″]Ракот на дојка кај мажите вообичаено се манифестира како тврда грутка под брадавицата. Мажите се позагрозени од жените и смртноста кај нив е поголема, примарно поради тоа што свеста за рак на дојка помеѓу машката популација е помала. Кај нив помалку веројатно е дека воопшто ќе ја насетат грутката, а доколку тоа се случи многу се мали шансите да се посомневаат дека тоа може да биде рак на дојка, што само го одолговлекува лекувањето и ја зголемува стапката на потенцијалниот морталитет.
Приклучи се и ти на симболичниот марш против ракот на дојка. Биди и ти дел од Напред розово!
По овој повод здружението за борба против ракот „Борка“ ќе ја спроведе кампањата „Напред розово `15 – чекори против ракот на дојка“. Овој марш ќе се одржи на 4 октомври (недела) во 11:00 часот на Плоштадот Филип Втори. „Време е за Розовата прошетка! По седми пат, заедно да чекориме… За оние кои ја водат оваа неизвесна битка… За оние чиј живот е пред огромен предизвик… И во чест на оние кои ги загубивме.“ – велат на нивниот Веб сајт.
