Гранола плочките содржат шеќерен сируп кој се поврзува со ризикот од зголемено количество на холестерол во крвта, зголемена телесна тежина и отпорност на инсулин
Гранола-плочките, како и многу други „маскирани“ производи на пазарот се промовираат како здрава храна или ужинка. Тие може да бидат составени со основа од јачмен, овес или ‘рж, но она што е многу важно е што во нивната обработка се додава големо количество шеќер што многумина не се свесни дека го внесуваат, бидејќи се заслепени од добриот маркетинг на прехрамбените компании.
„Општата перцепција е дека секој производ што го содржи зборот ’гранола’ спаѓа во здрава храна. Но постојат многу производи што звучат здраво, а всушност содржат многу шеќери и висококалорични состојки“, истакнува Јони Фредхоф, директор на Институтот по Медицина во Отава, Канада.
Зошто гранола плочките не се здрави?
Гранола плочките многумина ги сметаат за „здрава“ алтернатива за благо и ги консумираат секојдневно со што воопшто не прават здрав избор во исхраната. Имено, гранола плочките се составени од различни мешавини од овошје, зрна и семиња, што всушност поминуваат низ различни процеси на преработка во кои се додаваат големи количества на шеќер и вештачки засладувачи, за кои нутриционистите предупредуваат дека не сме свесни дека ги внесуваме.
Гранола плочките по состав се поблиски до колачи, отколку до здрава храна.
Многу истражувања и статистики покажуваат дека гранола плочките се присутни во секој дом како замена за чоколадо или колачиња, а вистината е дека тие по составот се многу поблиски со колачите, отколку со било која здрава храна. Гранола плочките се маскирани производи што во својот состав содржат големо количество на гликозно-фруктозен сируп, или изогликоза, состојка што вообичаено е содржана во нездравите прехрамбени производи и што се поврзува со ризикот од зголемено количество на холестерол во крвта, зголемена телесна тежина и отпорност на инсулин.
Домашно приготвени здрави гранола плочки
Гранола плочките се сместуваат во „нездрава“ храна заради начинот на кој се обработуваат или печат и врз основа на тоа дека во овие процеси се користат вештачки засладувачи. Но доколку сте љубители на гранола, може да ги приготвите сами со што ќе употребите здрави состојки и ќе го контролирате количеството на шеќер. Прочитајте го овој рецепт за домашно приготвена гранола.
