Научниците велат дека леќите со вградени био-сензори би можеле да помогнат во контролирањето на шеќерот во крвта
Транспаретни био-сензори вградени во контактни леќи можно е да им помогнат на докторите во контролирањето на нивото на шеќер во крвта, како и во откривањето на знаци за одредени болести без извршување на дополнителни тестирања. Научниците велат дека леќите со вградени био-сензори се засноваат на современата технологија којашто допринесе за развојот на мобилната индустрија и за изработката на паметни мобилни уреди со сè појасни екрани.
Тие истакнуваат дека токму оваа технологија може во иднина да се користи за откривање на рани знаци на рак и други посериозни болести.
Истражувачите и научниците коишто работат на развојот на овие контактни леќи ја претставија својата досегашна работа на 253-то издание на „National Meeting & Exposition of the American Chemical Society (ACS)“. Тие велат дека био-сензорите не би требало да ги искоренат од практиката лабораториските истражувања и тестирања на крвта коишто се користат во медицината со децении, но сметаат дека со био-сензорите би можеле да дознаат многу корисни информации едноставно и практично преку ставање капки во очите.
Идејата за развојот на био-сензорите што би се вградувале во контактни леќи ја добива Грегори С. Херман, научник што сакал да пронајде начин на кој би им помогнал на луѓето што боледуваат од дијабетес да можат постојано да го следат нивото на шеќер во својата крв со помош на контактни леќи со вградени био-сензори.
„Постојаното следење на нивото на шеќер во крвта, наместо вообичаените повремени тестирања би помогнало во намалувањето на ризикот за појава на дополнителни здравствени проблеми и компликации кај луѓето со дијабетес“, вели Херман.
Денеска се користат низа системи за мониторинг на шеќерот во крвта коишто бараат вметнување на електроди на различни делови под површината на кожата, што би можело да биде значително болен процес, а меѓудругото, електродите може да предизвикаат и различни кожни иритации и инфекции. Наспроти овие системи, био-сензорите, освен што би биле попрактични и побезбедни, би можеле и да ги елиминираат можностите за појава на било кои од компликациите што се можни со употреба на системите за мониторинг. Воедно, Херман се стреми кон развој на био-сензори што би биле транспарентни и незабележливи за окото што на корисниците би им дало дополнителна самодоверба и храброст за користење.
Повеќе од 2.500 био-сензори од кои секој би следел различни телесни функции можат да бидат вградени во само 1 мм од ИГЗО – контактните леќи.
По вградувањето на био-сензорите и ставањето на овие леќи би можеле да пренесуваат многу витални информации за здравјето на корисникот до било кој мобилен уред преку безжичен интернет и блутут.
