insulinska-lepenka-namesto-insulinski-inekcii
Споделете со пријателите!

Можноста засекогаш да се ослободиме од непријатните инсулински инјекции е на дофат на рака
Истражувачите од Универзитетот во Северна Каролина во САД ја направија првата таканаречена „паметна” инсулинска лепенка која може да го препознае зголеменото ниво на шеќер во крвта и да излачи одредена потребна доза на инсулин во крвта кога е потребно. Оваа лепенка можеби конечно ќе ги замени инсулинските инјекции кои се дел од секојдневието на дијабетичарите. Шеќерната болест е се позастапена во денешно време и секаков вид на олеснување кога станува збор за ова заболување е од полза. За среќа, научниците ја направиле првата инсулинска лепенка која можеби ќе биде едно големо олеснување во животот на дијабетичарите.

Иако револуционерна иновација инсулинската лепенка ќе треба да ги помине клиничките испитувања врз луѓе пред да се појави на пазарот.

Инсулинската лепенка е мала, не поголема од железна паричка и е направена од биокомпатибилни материјали кои не се токсични. На неа се поставени стотина малечки игли со големина на трепките од окото. Овие игли содржат иста количина на инсулин како и инсулинската инјекција, а исто така содржат и ензими кои функционираат како сензори за гликоза. Ваквите ензими можат да „прочитаат” кога нивото на шеќер во крвта е високо и тогаш брзо го испуштаат инсулинот во крвта. Оваа инсулинска лепенка до сега е тестирана само на глувци и за време на тестирањето се покажало дека ефектот на лепенката кога станува збор за намалување на нивото на гликоза во крвта кај глувците со тип 1 дијабетес траел девет часа. Инсулинската лепенка се уште не е клинички тестирана врз луѓе.

Прочитајте:  Имплантација на телескоп за подобрување на видот

insulin patch_2Ако зборуваме за дејствувањето на лепенката, може да се каже дека таа дејствува брзо, лесна е за употреба и е безболна. Инсулинската лепенка е исто така многу побезбедна за разлика од инјекциите. Според истражувачите, ако дијабетичарите направат грешка во инјектирањето на потребната доза на инсулин, тоа може да доведе до компликации како слепило, ампутација на екстремитетите, па дури и кома и смрт.

Лепенката е направена така што се имитирал природниот начин на производство и складирање на инсулин во телото на човекот, односно таканаречените бета клетки. Во човечкиот организам, бета клетките произведуваат и складираат инсулин во посебни „торбички”. Тие можат да препознаат кога нивото на шеќер во крвта е зголемено за да може да се испушти инсулин во крвта. Инсулинските лепенки се направени на истиот начин. Во многуте мали иглички на лентата, истражувачите вметнале слични, вештачки направени торбички чија намена е да ги изведуваат истите функции како и бета клетките. Во ваквите вештачки торбички ставиле инсулин, како и ензими кои дејствуваат како сензори за гликоза.

За време на третирањето на глувците со инсулинската лента било забележано дека за време од 30 минути нивото на шеќер во крвта било доведено под контрола и останало под контрола неколку часа. Истражувачите утврдиле дека кога лентата би била искористена врз луѓе, нејзиниот ефект кога станува збор за регулирањето на нивото на шеќерот во крвта би траел уште подолго.

Инсулинската лепенка ќе треба да ги помине клиничките испитувања врз луѓе пред да се појави на пазарот.


Споделете со пријателите!