Кај предшколските и школските деца кои се во процес на континурано учење, добрата меморија и способноста за концентрација се едни од најважните елементи.
Добрата меморија и способноста за концентрација се едни од најважните елементи на човековото ментално здравје независно од возраста. Особено се значајни кај предшколските и школските деца кои се во процес на континурано учење и евалуација на наученото. Иако долго време се сметаше дека овие способности се во најголем дел вродени и зависат од генетски фактори сепак начинот на кој ги храниме и комуницираме со децата може значајно да влијае во насока на зголемување или намалување на нивните капацитети.
Бројни истражувања на оваа тема потврдуваат дека клучен елемент за соодветен развој на мозокот и добра способност за учење, меморија и концентрација е соодветен внес на Омега 3 масни киселини во нашиот организам. Омега 3 масните киселини (ДХА (Docosahexaenoic Acid) и ЕПА (Eicosapentaenoic Acid)) се особено важни за структурата на мозокот, развојот на нервните клетки и нивните мембрани. Омега 3 масните киселини нашиот организам не може да ги произведе самостојно и затоа мора да бидат внесени преку морска храна, или да се внесат како додаток на исхраната. Децата кои внесуваат доволно омега 3 покажуваат подобра координација на рацете, социјални вештини и зголемена концентрација а од друга страна ја зголемува способноста на детето за учење, го подобруваат читањето и меморијата. Спротивно на ова децата кои имаат ниски нивоа на омега 3 масни киселини се склони кон проблеми: дислексија, губиток на меморијата и способноста за размислување и лоши резултати на психолошките и бихејвиоралните тестови. Возрасните пак почесто патат од психијатриски пореметувања: депресија, биполарно растројство и пост породилна депресија.
Заради сето ова е особено важно да се јаде риба барем два пати неделно (лосос, сардини, туна, скуша) а корисни може да бидат и лененото семе, ореви и други јаткасти плодови. Во однос на комуникацијата и воспитувањето на децата важно е да се воспоставуваат рутини: учење секогаш во ист дел од денот, и на исто место (маса) со што се зголемува концентрацијата и капацитетот за учење. Во прилог одат и активности кои поттикнуваат мисловен напор: мемориски игри, сложувалки, шах и др. Разговарајте со своето дете за неговите искуства и барајте од него да ги прераскажува своите активности. Сеќавањата на вашето дете ќе бидат побогати и тоа ќе научи како да ги пренесе во јасна форма. Децата треба да добиваат задачи кои вклучуваат вметнување зборови, асоцијации, синоними и споротивности и секако соодветно да бидат наградени за нивните постигнувања. Во однос на додатоците во исхраната кои може да помогнат во делот на подобро помнење и концентрација кај децата предничат комбинации на рибино масло (или Омега 3) со витамин Д бидејќи имаат и синергистички ефект во засилување на имунитетот што е особено важно кај оваа ранлива категорија.
Д-р Агрон Пајазити, специјалист педијатар
