Подгответе се за патувањето со вашето дете коешто има астма
Кога одите на одмор со вашето дете коешто има астма сигурно сакате да размислувате колку што е можно помалку за вашата астма за да можете да се опуштите и да уживате. Најдобар начин да го направите ова е патувањето добро да го испланирате однапред.
Пред да почнете да пакувате, осигурете се дека астмата на вашето дете е добро контролирана. Доколку астмата понекогаш се влошува или забележите дека лекарствата што ги прима не му помагаат во целост, посетете го вашиот матичен доктор бидејќи можеби ќе треба да му го промени лекот или да побараат од вас да го однесете детето на преглед.
Пред да тргнете на одмор:
- не заборавајте да ги понесете сите лекови за астма;
- понесете и дополнителна доза од лековите;
- консултирајте се со вашиот доктор за соодветна замена за лековите за астма во земјата во којашто ќе престојувате;
- понесете ги здравствените документи на вашето дете и осигурување;
- побарајте од вашиот доктор да напише писмо во коешто ќе го објасни детално типот на астма од којашто страда вашето дете, како и лековите коишто ги прима.
Како да избегнете напад од астма додека патувате?
Предизвикувачите на нападите на астма се надекаде околу нас. Со нив може да се сретнете уште пред да стигнете на крајната дестинација каде што ќе бидете на одмор. Возовите, автобусите, дури и вашиот автомобил може да содржат честички прав и мувла во седиштата, килимот или системот за вентилација.
Ако патувате со автобус, воз или друг јавен превоз, осигурајте се дека сте земале долгорочен лек за контрола на болеста на вашето дете и секогаш имајте го неговиот инхалатор лесно достапен до него.
Ако патувате со автомобил осигурајте се клима уредот да се вклучи и да работи најмалку 10 минути со прозорците отворени пред вашето дете да влезе во автомобилот. Ако поленот или загадувањето на воздухот ја активираат неговата астма, патувајте со затворени прозорци и уклучен клима уред.
Патувањето со авион, исто така, може да има свои ризици. Воздухот во авионите е многу сув, што може да предизвика појава на астма. Бидете сигурни дека инхалатор му е лесно достапен на вашето дете постојано и советувајте го да пие многу вода.
Како да избегнете напад на астма во просторот каде што ќе бидете сместени?
Следете ги следниве неколку совети доколку престојувате во хотел или комплекс апартмани со базен или пак во станот на пријател или роднина:
- побарајте со вашето дете да престојувате во сончева, сува соба сместена подалеку од базенот;
- доколку претходно сте имале лошо искуство со алергени од животни побарајте соба во која не биле чувани миленичиња;
- побарајте соба за непушачи;
- понесете посебна перница и прекривка за вашето дете;
- побарајте да се отстранат сите миризливи свеќи, освежувачи и сите производи што содржат аеросол од собата;
- побарајте вашата соба да биде темелно исчистена од прашински грини и мувла;
- ако престојувате со пушачи замолете ги да пушат надвор, особено доколку делите иста соба за спиење.
