Вдишувањето на чадот од цигари, познато како пасивно или второстепено пушење, може да го зголеми ризикот за заболување од рак и други здравствени проблеми.
Кога некој пуши цигара, чадот од тутунот што гори се шири во воздухот. Истото се случува и со чадот што пушачите го издишуваат. Чадот од цигарите може да остане во воздухот до 2,5 часа, дури и со отворен прозорец. Иако понекогаш не можете да го видите или да го помирисате, тој во големи количини останува во затворените простории дури и откако пушачите ќе престанат да пушат. Вдишувањето на чадот од цигари, познато како пасивно или второстепено пушење, може да го зголеми ризикот за заболување од рак и други здравствени проблеми.
Што претставува пасивното пушење цигари?
Пасивното или второстепено пушење цигари подразбира изложеност на чадот од тутунот што го пушат луѓето околу вас. Чадот од тутунот содржи повеќе од 4.000 хемиски состојки, од кои најмалку 250 се познати дека предизвикуваат болести. Пушењето е забрането на многу јавни места во многу држави, но многу луѓе сè уште се изложени на чадот од цигарите, особено децата кои живеат со родители кои пушат.
Изложеноста на чадот од тутунот за дури 30% го зголемува ризикот од заболување од срцеви болести, рак на белите дробови и многу други видови на рак, емфизем и други заболувања. Чадот ја прави крвта леплива, го зголемува ЛДЛ-холестеролот и ги оштетува ѕидовите на крвните садови. Овие промени може да предизвикаат поголема веројатност за срцев или мозочен удар.
Колку е опасно второстепеното пушење цигари за децата?
Децата се особено изложени на ризик за ефектите од пасивното пушење, бидејќи нивните тела сè уште растат и тие дишат побрзо од возрасните. Оттука, децата коишто живеат со родители-пушачи се секојдневно изложени на чадот од цигарите што може да предизвика:
- Синдром на ненадејна смрт кај новороденчиња (SIDS);
- Респираторни инфекции (бронхитис и пневмонија);
- Посериозен развој на астма со остри и чести напади;
- Менингитис;
- Ушни инфекции;
- Хронична кашлица.
Пушењето за време на бременоста е особено опасно за развојот на бебето. Тоа е поврзано со предвремено породување, ниска родилна тежина, ограничена ментална способност, проблеми со учењето и АДХД.
Како да го избегнете пасивното пушење?
Доколку можете, избегнувајте да бидете околу луѓето што пушат цигари или обидете се да ги убедите оние околу вас кои пушат да го прават тоа поретко. Вашиот дом е веројатно најважното место во кое треба да поставите граници, односно да не дозволувате да се пуши, особено ако имате деца.
Посочете им на пријателите и семејството дека би ви значело да пушат на терасата од вашиот дом кога ќе дојдат на гости. Држењето на децата настрана од чадот може да помогне во нивниот понатамошен развој како и во намалувањето на ризикот за појава на респираторни инфекции, тешка астма, рак и многу други сериозни здравствени состојби.
