Храната што ја јадете додека сте на работа, многу влијае врз вашата продуктивност
Доколку вашата работа е во канцеларија, тогаш сигурно мака мачите секој ден да размислувате што да јадете додека сте на работа. Планирањето и подготовката на храна на работа на прв поглед може да изгледа тешко, особено доколку сакате да се храните здраво и не сакате да посегнувате по печива, буреци и сендвичи. Исто така, важно е да имате енергија за да бидете продуктивни при работењето. Така, за да бидете продуктивни, храната што ја јадете треба да поседува хранливи влакна коишто ќе ви го одржуваат нивото на енергија. Квалитетниот сон и континуираната физичка активност имаат важна улога, но навиките во јадењето се клучни за енергија, продуктивност и континуирано одржување на здравјето. Прочитајте на кој начин да ја подобрите продуктивноста на работното место со неколку свесни избори на храна, како и секојдневни мали промени во животните навики.
Не јадете брза нездрава храна
Јадењето брза нездрава храна (junk food) е брз начин да ве забави. Оваа храна има многу „лоши“ масти кои ќе направат да се чувствувате уморни и поспани. Ваков вид на масти се заситените и транс мастите, коишто го подигаат нивото на ЛДЛ холестеролот, триглицеридите и нивото на липопротеините, а го намалуваат ХДЛ или „добриот“ холестерол. Всушност, причина плус за дебелина (покрај шеќерот) е консумирањето на транс масти во брзата храна. Наместо тоа, во вашето биро секогаш имајте при рака здрави грицки како сушено овошје или мешавина од јаткасти плодови и сушено овошје, микс од четири вида семиња, банана и сл.
Избегнувајте да јадете на работното биро
Јадењето пред монитор го одзема фокусот од чинот на јадењето и лесно може да се прејадете. Доколку сепак не сте во можност да јадете на друго место освен на биро, тогаш однапред одредете ја количината што ја консумирате. Затоа, паметен избор е да одберете оброк составен од здрави намирници и количински ограничен.
Не јадете сами
Јадете заедно со колегите. Од продуктивна и креативна гледна точка, важно е паузата за јадење, да ја поминете во интеракција со колегите.
Не прескокнувајте оброци
Имате премногу работа и одлучувате да не јадете ништо додека сте во канцеларија. Ваквата навика може да ве направи повити, но од здравствен аспект нема да ви помогне, туку може да ви го влоши здравјето и да ви го ослабне имуниот систем. За здрав оброк не ви треба многу време. Постојат здрави овесни оброци со целосно природни состојки и балансиран нутритивен профил, за чија подготовка се потребни буквално две минути. Освен тоа што изобилуваат со хранливи влакна, тие содржат и бета-глукан. Според податоците од Американското здружение за рак, овесните снегулки ја намалуваат количината на токсини во организмот. Освен тоа, овесните оброци коишто може да се најдат кај нас, дополнително се збогатени и со други високохранливи состојки коишто ќе ве исполнат со енергија како: банана, цимет, суво грозје, какао или кокос. Овој практичен оброк ќе ви овозможи засладување на сетилата и одржување на здравјето. Ваша задача е само да го прелиете ваквиот оброк со млеко, јогурт, чај или вода.
