Американската академија за педијатрија го обесхрабрува користењето на електронските уреди за децата помали од 24 месеци.
Електронските уреди се насекаде околу нас. Телевизори, мобилни телефони, компјутери, лаптопи – сите ние, вклучувајќи ги и децата од најмала возраст, сме опкружени со зрачењето на екраните на електронските уреди. Како резултат на тоа, контролирањето на времето коешто децата го поминуваат пред екраните станува сè потешко за родителите.
Она што дополнително ги отежнува работите е тоа што овие уреди понекогаш може да бидат и едукативни за децата, како и да го поддржат нивниот социјален развој. Оттука, родителите често си ги поставуваат прашањата „Колку време во текот на денот е доволно за моето дете да гледа во екранот?“ и „Како правилно да управувам со времето што моето дете го поминува пред екраните?“.
Насоки за времето поминато пред екран
Американската академија за педијатрија го обесхрабрува користењето на електронските уреди за децата помали од 24 месеци. Ако сакате да воведете користење на електронски уреди за деца на возраст од 18 до 24 месеци, експертите препорачуваат прво да се осигурате дека ќе му обезбедите квалитетна содржина на детето. За деца на возраст од 2 до 5 години, ограничете го времето на еден час дневно кој ќе биде квалитетно поминат на следење едукативна и забавна содржина. Како што вашето дете расте, овој пристап може да не функционира, оттука, ќе биде потребно да одлучите кои содржини се соодветни за возраста на вашето дете и колку време е доволно за следење на истите.
Проблемите со времето поминато пред екраните
Секојдневното играње е многу поважно за развојот на мозокот на малите деца за разлика од електронските уреди. И покрај фактот што многу телевизиски и интернет-програми се сметаат како едукативни, децата помлади од 2 години имаат поголема веројатност да учат и да се сетат на информациите што им биле кажани или пренесени во живо отколку оние што ги виделе и слушнале од телевизорот или компјутерот.
До 2-годишна возраст, децата може да имаат корист од одредени видови на детски програми, како што се музичките или цртаните програми. Сепак, пасивното време поминато пред екранот не смее да го замени читањето и играњето во живо во друштво на родителите или врсниците.
Од клучно значење е родителите да ги следат телевизиските и интернет-програмите што ги гледа детето, како и игрите што ги игра за да се осигураат дека се соодветни за неговата возраст. Содржини коишто се тешко разбирливи, страшни или насилни треба да се избегнуваат бидејќи може да влијаат на здравјето, расположението и однесувањето на детето.
Некои проблеми што може да се појават како резултат на прекумерно гледање телевизија, следење несоодветни содржини или играње игри се:
- Прекумерна тежина;
- Неправилен ритам на спиењето, прекумерно спиење или несоница;
- Проблеми во однесувањето;
- Губење на социјалните вештини;
- Агресивност или насилство.
Интернетот и телевизијата стануваат дел од животот на секое дете на пред-училишна и училишна возраст. Оттука, освен што треба да внимаваат на времето коешто децата го поминуваат пред екраните, родителите треба да ги запознаат со опасностите коишто може да се појават во дигиталниот свет.
Експертите сугерираат дека е многу важно децата да разберат кои однесувања се соодветни, а кои несоодветни. Оттука, уште на помлади години родителите треба да ги подучат што значи и како да се заштитат од интернет-насилство, како и кои се опасностите од споделувањето на лични информации на интернет.
