Како да го подготвиме нашиот организам за проблемите поврзани со летните патувања

Доколку се соочите со подлабоки рани или повреди, или пак дијареата, температурата или повраќањето перзистираат повеќе од 2 дена побарајте стручна помош. 

Прва асоцијација за летo се секако сонце, вода, плажа и патувања со цел да се релаксираме и да ги наполниме батериите. Сепак летниот период носи својствени здравствени ризици поврзани со високите температури, УВ зрачењето, промена на исхраната и бројните активности на отворено. Патувањата дополнително носат промена на климатските и хигиенските услови, локална храна и вода на која не сме навикнати, а плажата е извор на бројни, за нас, нестандардни патогени.

Кои се најчестите здравствени проблеми во летниот период?

• Проблеми предизвикани од сончевото зрачење (УВ зрачење и високи температури): изгореници на кожата, алергии, сончаница, дехидратација.
• Убоди од разни инсекти (комарци, оси, пчели, крлежи) или контакти со медузи, кои резултираат со болка, црвенило, чешање, а понекогаш се проследени и со сериозни алергиски реакции.
• Повреди на зглобови, фрактури, гребаници, исеченици, поврзани со зголемена физичка активност на отворено (планинарење, рафтинг, одбојка/фудбал на плажа, ватерполо…).
• Труење со храна поради несоодветна подготовка или чување а поврзано со високите температури и недоволната хигиена. Јадењето на отворено и од непроверени локации е најчесто во летниот период.
• Проблеми при патувања: стомачни тегоби и мачнина, дијареа, запек, повраќање, дехидратација и покачена телесна температура. До 60% од патниците доживуваат патничка дијареа годишно.

Како да го подготвиме нашиот организам за проблемите поврзани со летните патувања?

Со оглед на гореспоменатите ризици неопходно е соодветно да ја подготвиме нашата кожа и да го засилиме својот цревен и општ имунитет во периодот пред патувањата.

• Бидете изложени на сонце 2-3 недели пред патувања барем по 1 час на ден. Секако избегнувајте го периодот од 11-17ч а доколку е неопходно да се движите во средина на денот, тогаш задолжително користете средства за заштита од сонце со висок заштитен фактор. На овој начин ќе направите првобитна подготовка на вашата кожа за подолги периоди на плажа кои ќе следат.
• 2 недели пред поаѓањето на одмор користете суплементација со пробиотици, витамини и минерали (пред се витамин Ц, витамин Д и цинк). На овој начин ќе ја припремите стомачната микрофлора за нападот на непознати патогени и ќе го подигнете имунитетот воопшто. Конзумацијата на пробиотици и споменатите витамини и минерали треба да продолжи и за време на одморот како и 10тина дена потоа. Статистиката вели дека соодветно превентивно користење на пробиотици ја намалува патничката дијареа за дури 85%.
• Избегнувајте патувања во најтоплиот дел од денот и секогаш имајте со себе доволни количини свежа вода и добро измиено овошје.
• Избегнувајте да транспортирате и конзумирате лесно расиплива храна: месо, јајца, мајонез, млечни продукти како и сендвичи со сувомесни преработки.

Што треба да содржи вашата патна аптека?

Заради гореспоменатите ризици добро е да имаме со нас „мала патна аптека“ која ќе содржи:

• Прва помош за проблеми при патувања: пробиотици, ОРС (орални рехидратациски соли), антипиретици (средства за намалување на температурата) како и топломер. При летните стомачни проблеми е најважно да се стопира дијареата и соодветно да се рехидрира организмот со соодветни пробиотици и средства за орална рехидратација.
• Прва помош за проблеми со изложеноста на сонце: креми за заштита од сонце и креми за после сончање, средства против алергии и креми против изгореници од сонце. Нанесувајте крема 30 минути пред изложување на сонце и секогаш кога сметате дека е измиена од вашето тело. Откако ќе заврши денот поминат на плажа, секогаш користете средство наменето за после сончање.
• Прва помош за проблеми со инсекти: средства против инсекти (комарци), креми за ублажување на болка од убоди од инсекти или медузи, како и пинцета за отстранување на страни тела од кожата.
• Прва помош при повреди: средства против болки (аналгетици), креми за ублажување на спортски повреди, водоотпорни фластери, завои и средства за дезинфекција на рани.

Доколку се соочите со подлабоки рани или повреди, или пак дијареата, температурата или повраќањето перзистираат повеќе од 2 дена побарајте стручна помош.