Јајца во салатата за подобра апсорпција на хранливите материи

Јајцата можат да бидат одличен додаток во летните салати не само поради одличниот вкус, туку и поради нивната улога во зголемената апсорпција на хранливите материи од зеленчукот

Жешките летни денови сами по себе не ни дозволуваат да консумираме обилни оброци многу често. Затоа кога станува збор за летото, салатите се одличен избор за да ги внесеме сите потребни хранливи материи, а сепак да останеме во добра форма. Зеленчукот изобилува со хранливи материи чија апсорпција во човечкиот организам е многу важна.

Како резултат на истражување спроведено на Универзитетот Пердју – Purdue University во САД се дошло до интересен и многу значаен заклучок кога станува збор за салатите и апсорпцијата на хранливите материи. Според истражувањето, ако додадеме јајца во салатата со зеленчук значително ќе ја зголемиме апсорпцијата на хранливите материи што ги има во зеленчукот. Зеленчукот е богат со каротеноиди како бета-каротин, лутеин, зеаксантин и ликопен. Овие хранливи материи се полезни за човечкото тело затоа што имаат многу здравствени придобивки, меѓу кои се вбројуваат ублажувањето на воспалителните процеси во организмот и спречувањето на разни заболувања. Во денешно време кога сите живееме брз живот и сме под влијание на стрес скоро секој ден, јадењето на здрава храна е многу важно. Зеленчукот зазема високо место на листата на здрава храна која ни е потребна. Меѓутоа, многумина од нас не внесуваат доволни количини на зеленчук во секојдневната исхрана што води до намален внес на каротеноиди. Јајцата пак, содржат липиди кои ја подобруваат апсорпцијата на сите видови на каротеноиди кои ги има во зеленчукот. Затоа, покрај почестото вклучување на зеленчукот во исхраната, додавањето на цели јајца во салатата со зеленчук ќе ни помогне да ги внесеме сите потребни хранливи материи од зеленчукот.

Истражувањето било спроведено врз 16 учесници кои најпрво јаделе салата од мешан зеленчук без јајца, па салата со едно јајце и половина и на крај салата со три јајца. Како резултат на испитаната крвна слика на 16те учесници после оброците, било заклучено дека апсорпцијата на каротеноиди била од 3 до 8 пати поголема кога салатата содржела три јајца отколку кога не биле додадени никакви јајца. Исто така, според истражувачите многу е важно да се консумира целото јајце, и белката и жолчката, за да се добијат очекуваните резултати.

Кога станува збор за липидите, јајцата не се единствените продукти што ги содржат. Различните преливи за салати содржат липиди кои исто така можат да ја зголемат апсорпцијата на хранливите материи од зеленчукот, но според истражувачите од Универзитетот многу лесно може да се претера со употребата на преливот и со тоа да се внесат непотребни калории во организмот. Тие ја споредуваат количината на калории во две лажички прелив потребни за една салата и количината на калории во едно цело јајце и доаѓаат до заклучок дека во наведената количина на прелив има од 140-160 калории, додека во едно големо цело јајце има околу 70 калории.

Затоа, ако сакате да останете во форма и истовремено да си ја подобрите здравствената состојба преку внесување на потребните каротеноиди од зеленчукот, нареден пат можете да си направите вкусна комбинација од зеленчук и јајце.