Нова вакцина против рак ја поттикнува антивирусната одбрана на телото. Германските научници неодамна претставија метод на „тројански коњ“ што го напаѓа ракот
Тестиран на само тројца пациенти досега, научниците тврдат дека овој третман е најновото медицинско достигнување во полето на имунотерапијата. Оваа терапија има за цел да ги поткрене сопствените имунолошки својства на телото што го заштитуваат од болести и сè уште е во зародиш. Овој „тројански коњ“ е создаден во лабораторија и се состои од наночестички што содржат РНА на ракот (полимерична молекула што се употребува во разни биолошки процеси кај кодирањето, декодирањето и регулацијата на гените). Тоа е форма на генетско кодирање оградена со мембрана од масна киселина. Научниците го надитриле виралниот одговор на телото за да се бори против ракот.
Честичките се инјектираат во пациентите за да се симулира вирусен напад и да се инфилтрираат специјализирани имунолошки клетки. Овие таканаречени дендрични клетки го декодираат РНА-то вградено во наночестичките, поттикнувајќи го на тој начин производството на антигените на ракот. Антигените потоа ги активираат Т-клетките што се борат против ракот, што го подготвува телото да е спремно за напад од рак.
По успешните лабораториски обиди врз глувци, тројца пациенти со рак на кожа во напредна фаза беа третирани со мали дози од новата терапија. Научниците во зборникот Nature потврдуваат дека сите испитаници развиле силен имунолошки одговор. Во наредните обиди научниците откриле дека терапијата е ефикасна.
Тие додаваат дека методата може да помогне во отворањето на патот кон универзалната вакцина против сите видови на рак.
Новиот третман против рак се нарекува „РНА вакцина“ којашто функционира исто како превентивната вакцина, имитирајќи инфекција и го вежба телото да реагира кога таа вистински ќе се појави. Иако научниците се импресионирани од успешноста на нивниот експеримент, тие предупредуваат дека сè уште е многу рано пред оваа вакцина да биде одобрена. „Сè уште е рано и ќе бидат потребни поголеми истражувања за да се потврдат овие наоди“ – истакнуваат авторите на студијата Џоланда де Врис – Jolanda de Vries и Карл Вигдор – Carl Figdor од Универзитетскиот медицински центар „Редбуд“ од Холандија.
Имунотерапијата веќе се користи во лекувањето на одредени форми на рак, но нешто како „универзална вакцина“ против сите видови на канцер, сè уште не постои. За разлика од бактериите, вирусите или габите, коишто можат лесно да бидат уништени со помош на синтетички лекови или пак спречени со вакцини, без некои поголеми оштетувања на целиот организам, канцерогените клетки не се напаѓачи, туку наши сопствени клетки со нарушено ДНК. Токму поради тоа, имуниот систем на нашето тело не реагира на нив, а потрагата по успешен лек што ќе ги уништува само клетките на канцерот, а нема да ги оштетува здравите клетки во телото е во тек.
„Иако истражувањето е многу интересно, тоа сè уште е на некој начин далеку од тоа да биде со докажана корист за пациентите“ – заклучува професорот по имунотерапија Алан Мелчер – Alan Melcher од Институтот за истражување на рак во Лондон.
