Откривањето на ракот на панкреасот во раните фази може да ви го спаси животот
Кога станува збор за здравјето, секаков вид на напредок во медицината е од особено значење за пациентите. Ракот на панкреасот е ретко заболување кое многу тешко се открива во раните фази. Симптомите не се очигледни и често не се појавуваат се додека ракот не напредне, притоа загрозувајќи го животот на пациентите. Но, благодарение на тим на истражувачи од Центарот за рак во Хјустон – Anderson Cancer Center in Houston, со помош на едноставно тестирање на крвта би можело да се открие рак на панкреасот во раните фази.
Според истражувачите, до сега, овој тест на крвта за рано откривање на ова тешко заболување е 100% точен. Тие велат дека ракот на панкреасот може да се открие благодарение на мали честички во крвта наречени егзозоми – exosomes кои се со големина на вирусните честички. Овие честички можат да се најдат во сите видови на телесни течности во организмот, вклучувајќи ги и крвта и урината. Тие имаат форма на мали торбички кои носат протеини или ДНК низ човечкиот организам и играат клучна улога во низа на биолошки процеси. А како резултат на истражувањето, се сметаат и за потенцијални индикатори за рак на панкреасот.
Во текот на анализите и истражувањата на тимот учествувале 190 пациенти со рак на панкреасот, 32 пациенти со рак на дојка и 100 здрави доброволци. Биле земени примероци од крвта на сите учесници во истражувањето при што биле извадени и анализирани милиони егзозоми од многу мала количина на крв. За време на анализите, истражувачите ја испитувале содржината на „торбичката“ на егзозомот. Притоа, било забележано дека еден специфичен протеин наречен GPC1 бил пренесуван само од егзозомите кои биле најдени во крвта кај пациентите со рак на панкреасот. Овој индикатор, односно егзозом кој го носи специфичниот вид на протеин GPC1, бил пронајден во 100% од примероците од крв на пациентите болни од рак на панкреасот. Индикаторот не бил најден во ниеден примерок од крвта на здравите доброволци.
Со понатамошни анализи, истражувачите утврдиле дека може да откријат и со колку тежок вид на рак се соочувале пациентите како и колкава е веројатноста ракот да напредне после операција. Сето ова било возможно да се утврди доколку се земе во предвид количината на протеинот кој е пренесуван во егзозомите. Исто така како резултат на анализите, бил пронајден рак на панкреасот во рана фаза кај седум пациенти.
Сепак, резултатите од ова истражување мора да се проверат и да се направат дополнителни испитувања затоа што специфичниот протеин се појавил и во 24 примероци од вкупно 32 примероци од крв земени од пациентите болни од рак на дојка. Тоа значи дека истражувачите дополнително треба да најдат начин како да направат разлика помеѓу различните видови на рак кон кои овој индикатор во крвта може да не упати.
Според Рагу Калури – Raghu Kalluri од Центарот за рак во Хјустон, овој вид на тестирање на крвта за рано откривање на рак на панкреасот би можело да биде достапно за кратко време од една година, и ако тоа се случи, според него би можело да се спасат многу животи.
Да се надеваме дека тимот ќе успее да го усоврши овој вид на тестирање на крвта за рано откривање на овој вид на рак затоа што стапката на смртност предизвикана од ова заболување е доста голема, а не постои друг начин за негово рано откривање. Ова истражување дава голема надеж и може да биде значаен напредок во медицината.
