Синузитис претставува воспаление на слузокожата на параназалните шуплини – синуси.
Синузитот најчесто се појавува после инфекција (вирусна, бактериска или габична) на горните респираторни патишта а во одредени ситуации и како резултат на алергиска реакција. Во некои случаи како резултат на несоодветно и недоволно долго лекување може да премине во хроничен синузит кој обично трае 3-8 недели, а може и повеќе месеци. Хроничниот синузит се активира како резултат на пад на имунитетот, нелекувана настинка, ладно и влажно време, силен ветер, загаден воздух, чад од цигари или под дејство на алергени (полени). Карактеристични симптоми за хроничниот синузит се долготраен ринит, оток и запушеност на носот и синусите, оток на очните капаци и конјуктивитис. Зголеменото лачење на секрет од носот честопати инфекцијата ја спушта кон грлото и белите дробови. Пациентите често кашлаат, имаат лош здив и намалено сетило за мирис, а се жалат и на главоболка и несоница.
Со цел да се намалат повторните рецидиви на хроничниот синузит особено е важно да се одржува високо ниво на имунитет преку соодветна минералновитаминска подршка (цинк, витамини Ц и Д), како и долгорочна употреба на пробиотици и бетаглукани. Пациентите треба да избегнуваат ветер, загаден воздух и престој во простории во кои се пуши. Во зимскиот период главата и носот треба секогаш да бидат соодветно заштитени. Доколку се алергични, во сезоната на полени треба да бидат особено внимателни и да не излегуваат во периодите од денот кога концентрациите на алергените се високи. Важно е и да се одржува добра дентална хигиена и навремено да се третираат болестите на носната шуплина и респираторниот систем.
Доколку сепак дојде до активација на хроничниот синузит на пациентите најпрвин им се препорачува симптоматски третман: чистење на носната шуплина со солени раствори неколку пати на ден, инхалација на комбинација од хипертоничен солен раствор, ACC (acetil cistein) и/или етерични масла, со цел отпушување и чистење на синусите. Навечер може локално да се аплицираат деконгестиви во период од најмногу 7 дена, со цел да се намали отокот на слузницата и лачењето на секрет како и да се олесни спиењето а во некои случаи корисно е и зрачење на синусите со инфра- црвена ламба со цел намалување на секрецијата. Во случај на главоболка и температура по потреба се користат аналгетици и антипиретици. Во случај на потврдена бактериска инфекција дополнително се ординира и антибиотска терапија, во времетрање од 10-14 дена по претходно направен антибиограм и консултација со ОРЛ специјалист. Ако е потврдена и алергија, тогаш се ординираат и антихистаминици како и кортикостероиди. Со оглед на непријатноста и долготрајноста на симптомите особено е важно пациентите да ја почитуваат препишаната терапија.
Во случај на неуспех на конзервативната терапија можеби е потребна и хируршка интервенција особено доколку појавата на синузит има и анатомска подлога.
Д-р Зоран Максимовиќ, специјалист оториноларинголог
