intervju-so-d-r-zoran-maksimovikj-probiotik-so-sekoj-antibiotik_image1
Споделете со пријателите!

Загадениот воздух, маглата, ветерот, како и поминување на најголем дел од времето во затворен простор, резултираат со зголемен број на респираторни вирусни и бактериски инфекции
Комбинацијата од Lactobacillus acidophillus, Bifidobacterium animalis ssp. Lactis и Lactobacillus casei, со цинк и витамин Б6, не само што брзо ги решаваат несаканите гастроинтестинални ефекти на антибиотиците, туку и помагаат за засилување на имунитетот, истакнува д-р Зоран Максимовиќ, специјалист по ОРЛ. 

Од ваше лично искуство дали се зголемува бројот на пациенти со ушни инфекции во есенско-зимскиот период и кои инфекции се најчести?

Поради променетите временски услови (ветер, магла, загаден воздух), како и поради промената во животниот стил (поминување на најголем дел од времето во затворен простор), значајно се зголемува бројот на респираторни вирусни и бактериски инфекции. Најчести се отити на средно уво (акутен и хроничен отитис медија), акутни горнореспираторни инфекции (ринитис, синузитис, тонзилитис, фарингитис) како и егзацербација на хронични горнореспираторни инфекции.

Колку често се одлучувате за третман со антибиотици при ушните инфекции и кои антибиотици се најфреквентни?

Клиничката пракса покажува дека дури 80-85% од пациентите кои имаат акутни инфекции или влошени хронични инфекции се третирани со антибиотски третман. Третман со антибиотик се започнува по клинички преглед и реализирана крвна слика, во случаи на назален секрет жолтозелен по боја, како и по упатување на микробиолошки брис ако имаме позитивен наод (и тоа најчесто Streptococcus pneumonie, Moraxella cataralis, Haemmofilus influence итн…). Најчесто употребувани антибиотици се пеницилини – сами или во комбинација со клавулонска киселина и цефалоспорини. Покрај нив фрекфентно се користат и макролиди, хинолони, сулфонамиди.

Дали и колку користите пробиотици во тек на антибиотската терапија заради намалување на несаканите ефекти на антибиотиците?

„Употребата на пробиотици е задолжителна при антибиотски третман подолг од 5 дена“

Во однос на употребата на пробиотиците се водам според максимата: „Пробиотик – со секој препишан антибиотик“. Пробиотиците се неопходнен партнер при антибиотската терапија бидејќи антибиотиците генерално ја нарушуваат нормалната флора т.е. балансот помеѓу „корисните“ и штетни микроорганизми во организмот. Ова доведува до антибиотски асоцирана дијареа како најчеста компликација, чувство на надуеност и болки во стомак. Употребата на пробиотици е задолжителна при антибиотски третман подолг од 5 дена, особено за третман на акутен отитис медиа и акутен риносинузитис, а генерално и за било која хронична инфекција.

Прочитајте:  Светска недела на рационална употреба на антибиотици

Кои пробиотски комбинации се најсоодветни и ги најчесто ги препорачувате?

Она што е важно, е дека пробиотиците кои се користат да бидат во доволна концентрација, секогаш комбинирани со пребиотик (кој го осигурува нивниот раст и развој) и секако заштитени во желудочно отпорна капсула со цел да стигнат во доволен број до местото на делување а тоа е тенкото црево. Во моето клиничко искуство, најдобри резултати имам со примена на комбинирани пробиотици од видовите: Lactobacillus acidophillus, Bifidobacterium animalis ssp. Lactis I Lactobacillus casei најдобро во комбинација со цинк и витамин Б6. Овие комбинации не само што брзо ги решаваат несаканите гастроинтестинални ефекти на антибиотиците туку и помагаат за засилување на имунитетот.

Кои витамини и минерали се значајни за засилување на нашата отпорност кон заболувања?

intervju-so-d-r-zoran-maksimovikj-probiotik-so-sekoj-antibiotik_imageЕдноставно речено, нашиот имунитет се базира на претходно создадени антитела во организмот, кои се врзуваат со бактериите и вирусите и на тој начин го спречуваат инфицирањето на клетките. Во овој контекст најважни елементи за продукција на антителата се витамин Ц и цинк. Витамин Ц го има во високи концентрации во леукоцитите и неговата употреба е најголема за време на инфекции. Исто така, витаминот Ц ја поттикнува пролиферацијата на Т-лимфоцитите при имунолошките реакции (производство на имуноглобулини). Цинкот, од друга страна, учествува во диференцијација на Т-лимфоцитите. Ја индуцира хемотаксијата и ги поттикнува леукоцитите да одат на местото на инфекцијата. Недостатокот на цинк, негативно влијае на Б и Т-лимфоцитите, забавувајќи ја нивната реакција при инфекции, а доведува и до нивна забавена пролиферација и побавно производство на антитела.

Ваш совет до пациентите: како да го засилиме имунитетот и да го намалиме ширењето на инфекциите во есенско-зимскиот период?

Генерално најважно е да се подигне културата на живеење на повисоко ниво. Граѓаните треба да ги користат максимално сончевите денови за прошетки на отворено, а за време на викендите препорачливи се излети на планина (особено за жителите кои живеат во градски средини каде воздухот доста загаден).

Покрај ова, особено е важно, свесно да не се носат деца болни од респираторни инфекции во градинки, училишта и игротеки бидејќи на овој начин ги шириме заболувањата.

Во овој период корисно е да се внесуваат и соодветни комбинации на пробиотици, витамини и минерали како природни засилувачи на имунитетот.


Споделете со пријателите!