Споделете со пријателите!
За да ја превенираме појавата на хипертензија клучно е да изградиме здрави навики од рана возраст
Денешниот здравствен совет ќе го посветам на еден од најчестите причинители за смртност во денешниот свет хипертензијата. Хипертензија е трајно покачен артериски крвен притисок со вредности на систолниот крвен притисок над 140 mm Hg и/или дијастолен крвен притисок над 90 mm Hg. Хипертензијата е присутна кај повеќе од 25% од сите лица над 18 години а дури 50% од популацијата постара од 65 години има покачен крвен притисок.
Хипертензијата е главен причинител за срцеви и бубрежни заболувања:
- 54% од сите инфаркти на срцето;
- 47% од случаите на исхемиска срцева слабост;
- Мозочен удар;
- Периферна васкуларна болест;
- Бубрежни болести.
Иако понекогаш хипертензијата настанува како резултат на генетски фактори, возраста и менопауза (кај жени), сепак главен фактор за покачување на крвниот притисок сме самите ние т.е. несоодветниот животен стил кој го водиме:
- Нездрава исхрана богата со прости шеќери (слатки) и животински масти, во комбинација со недоволна физичка активност = дебелина и хиперлипидемија;
- Претеран внес на сол – води кон уништување на бубрезите;
- Претерана конзумација на алкохол;
- Прекумерен внес на кофеински напитоци;
- Пушење;
- Лошо менаџирање на стресот.
Како да ја превенираме појавата на хипертензија?
Клучно е да изградиме здрави навики од рана возраст:
- Здрава исхрана која содржи големи количини интегрални житарки, зеленчук и овошје и мала количина црвено месо, маснотии и шеќери;
- Прекин на пушење, бидејќи пушењето го зголемува крвниот притисок ја забрзува работата на срцето и ги стеснува крвните садови;
- Ограничување на внесот на алкохол на помалку од две чаши вино дневно;
- Ограничување на внес на кофеински напитоци до 2 кафиња на ден (пожелно пред 16часот)
- Намалување на внесот на сол бидејќи ги намалува компликациите од хипертензија до 30%. Дозволениот внес на сол е до 5 g на ден;
- Контрола на телесна тежина и одржување на посакуван BMI (body mass index) = 18,5-24,9;
- Редовна физичка активност 3-5 дена во неделата од минимум 30минути;
- Избегнување на стресот.
Во случај на дијагностицирана хипертензија пациентот треба да не изложува на тешки физички и психички напори и строго да се придржува кон медикаментозна терапија со цел да се одржуваат целните вредности на притисокот и да се минимизира опасноста од кардиоваскуларни инциденти.
Споделете со пријателите!
