Женските списанија не влијаат само врз самодовербата на младите девојки, туку и врз самодовербата и сексуалноста на жените во средна возраст
За ефектот на женските списанија врз младите девојки досега многу се пишувало и постојат бројни научни истражувања за негативното влијание на женските списанијата врз нивото на депресија, губење на самодоверба и проблеми со исхрана кај тинејџерките и адолесцентките. Но што се случува кај жените коишто се во возраст над 30, 40 и 50 години? На кој начин овие списанија влијаат врз нив?
Идеализирањето на тенка става и беспрекорно лице е концепт стар колку и женските списанија.
Тие се извор на незадоволство кај жените за својот надворешен изглед којшто произлегува од споредбата со нереалната и фотошопирана убавина од списанијата. Теориите и истражувањата се бројни и обемни, па така, овие истражувања неминовно се поклопуваат и со маркетиншките цели, бидејќи незадоволството/задоволството со себеси всушност продава, односно привлекува купувачи.
Поточно кажано, доколку жените се чувствуваат (условно кажано) „загрозени“ од убавината на моделот во списанието којашто рекламира одреден производ, оваа реклама кај нив ќе има негативен ефект, односно нема да бидат привлечени да го купат производот. Од друга страна, доколку убавината на моделот е суптилно прикажана, односно ставена во контекст и во улога на производот, тогаш таа реклама има позитивен ефект, односно жените се привлечени од моделот и од производот, бидејќи не им е во преден план ставен пред нивните очи, давајќи до знаење „ти не си совршена како мене.“
Како овие списанија влијаат врз жените над 40?
Кратко сценарио: Имате 45 години и купувате популарно женско списание. Додека го разгледувате гледате исклучиво млади и слаби модели и евентуално некоја актерка која има над 40, но изгледа како да има 20 години. Никаде ни трага од брчки и стареење. Како ќе се чувствувате? Прикажувањето на жени над 40 години не е реткост само во списанијата, туку воопшто во рекламирањето.
Жени модели од 30 години се прикажани во улоги на жени од 50 години и рекламираат крем против брчки.
„Сево ова води до негативна претстава за себеси“ вели проф. д-р. Денис Луис (Denise Lewis) од Универзитетот во Џорџија, авторка на студија поврзана со (не)прикажувањето на стареењето во склоп на модните списанија. Таа испитала дека во списанијата во кои читателките се над 50 години, постои само 8 до 9 проценти застапеност на жени во 40-тите години на нивните страници.
Стареењето се признава единствено како проблем кој треба да се отстрани…
Овој тренд води до непризнавање на стареењето и потврдување дека идеалот на убавина е да се остане млад колку што може повеќе. Стареењето се признава единствено како проблем кој треба да се отстрани, во форма на рекламирање на производи за третирање на брчки. Староста е „розовиот слон во просторијата“, односно насловните модни страници. Незадоволството со себеси кај повозрасните жени не се одразува само врз физичката појава, туку и врз целокупното здравје.
Луис се задржува и врз нарушувањата во исхраната. Имено, анорексијата и булимијата не се застапени само кај тинејџерките. Имено, две постари студии направени во 90-тите години, докажале дека жените од 40 до 59 години се исто така жртви на анорексија и булимија заради незадоволство со надворешниот изглед. Околу 4,5 проценти од жените на средна возраст имаат нарушувања во исхраната, а многу студии овој проблем го поврзуваат со притисокот што го имаат жените да изгледаат послабо кој доаѓа од нивната околина, семејството и медиумите.
Пеги Брик, (Peggy Brick) едукатор за сексуалност, вели дека третирањето на медиумите кон средната возраст како да се невидлива група на луѓе, придонесува тие да не се чувствуваат сексуално привлечни.
„Се трудам моите студенти да ги натерам да се борат со стереотипите дека сексот е само за млади и убави и дека она што е старо е грдо и сексуално непривлечно…Сметам дека некои луѓе сериозно ги имаат сфатено овие пораки“, вели Брик.
