Кои се главните причинители за појава на пигментирана кожа, пеги и дамки и како се лекуваат
Најголемите грижи за кожата, кај повеќето жени, се брчките и пигментираната кожа. Пигментираната кожа е чест дерматолошки проблем кој претставува голем естетки проблем а се дефинира како состојба на кожата која што на делови е посветла или потемна од вообичаено. Доколку има појава на темни кафени дамки, тогаш станува збор за хиперпигментација.
Бојата на кожата е одредена од гените. Степенот на пигментација на кожата не влијае само на бојата туку и на извесни дерматолошки состојби и болести. Треба да се истакне дека белезите и пегите настанати од раѓање се различен вид на пигментација, која што е генетски одредена и се различни од дамките и пигментацијата, коишто се стекнати промени. Дамките кои што се последица на стареење на кожата се поголеми и се појавуваат најмногу на рацете и лицето.
На кој начин се јавува пигментацијата
Механизмот за појава на пигментација на кожата, потекнува од оштетени пигментни клетки на кожата, која што потоа произведува меланин во големи количини. Сонцето не е единствениот виновник за настанувањето на флеки и пигментирана кожа. Други најчести причини за појава на пигментирана кожа, се и стареењето на кожата и траумите. Всушност, еден од првите знаци на стареење е токму пигментираната кожа, која што воедно станува сува и опуштена.
Причини за пигментација на кожата
- Неконтролирано производство на меланин. Женските хормони, слично како и УВ зрачењето, ги стимулираат пигментните клетки на кожата да произведуваат поголеми количини на меланин;
- Стареење на кожата;
- Воспалителни процеси на кожата како егзема, акни, алергичен контактен дерматитис;
- Постинфламаторни пигментации како резултат на одредена траума, која што може да биде механичка, физичка или хемиска.
Промените на бојата на кожата може да се појават и заради хормонални промени, гени, употреба на контрацепција, бременост. Пигментација на кожата може да биде резултат на:
- Рак на кожа, вклучувајќи го малигниот меланом;
- Адисонова болест кој на кожата се манифестира со темен пигмент во пределот на устата;
- Проширени вени;
- Пигментација после зрачење;
- Обоеност како последица од контрацептивна терапија;
- Реакција на храна и лекови;
- Мелазма.
Се појавува на челото, образите брадата и горната усна. Се појавува најмногу кај жени и само во 10 проценти кај мажи, има наследен фактор а се појавува како последица на промена на хормонски статус. Мелазма е исто така позната и како „трудничка маска“, бидејќи може да се појави за време на бременоста и поминува сама од себе, но треба да се избегнува изложување на сонце.
Третман на пигментирана кожа
Пигментацијата е комплексна состојба, па затоа избелувањето на кожата е процес. Во зависност од локацијата, како козметички третмани се применуваат: хемиски пилинг, дермоабразија, ласер и сл. Дерматолозите препорачуваат и кремови за избелување или комбинација од различни видови на третмани во зависност од видот и состојбата на кожата.
За отстранување на дамките и пегите, треба да бидете упорни доколку сакате да ги третирате успешно и неивазивно, со користење на природни препарати.
Не го одолговлекувајте третманот и не чекајте. Старите пигментни дамки тешко се отстрануваат, бидејќи со тек на време пигментот продира во сè подлабоките слоеви на кожата и станува тврдокорен. За долготрајна и ефикасна нега на кожата, одлучете се за квалитетни природни производи (дневни и ноќни кремови, серуми) со природни екстракти, коишто поседуваат лесна текстура специјално формулирана за осветлување на темни дамки на кожата, која што отстранува неправилности како пеги, го спречува производството на меланин и го разубавува лицето давајќи му изедначен и чист тен.
Како најголема превенција од пигментација, се препорачува висок заштитен фактор, носење заштитна соодветна облека и користење на природни производи за нега. Запомнете, превенцијата е најдобрата формула до чист тен.
Напомена: За ефективно решение, треба да ја дознаете причината на вашата пигментација. Промената на големина или боја на појавена кафена дамка може да укажува на рак на кожа. Задолжително консултирајте се со лекар за секоја необична промена на бојата на кожата која што ќе ја забележите.
