Детски колики или познати како инфантилни колики е состојба на постојано плачење кај здраво бебе.
Обично ова плачење не е проследено со други здравствени проблеми. Причината за појавување на овие колики кај бебињата уште не е разјаснета, меѓутоа третманот се прави врз база на неколку ставови.
Еден од тие ставови е дека бебињата, посебно оние родени со царски рез не превземаат ништо од флората на мајката и поради таа причина имаат повеќе колики во однос на бебињата родени по природен пат. Друга причина е вовлекување на воздух при доење или хранење, како и при плачење. Влијание врз појавувањето на коликите има и начинот на хранење поради што се смета дека бебињата кои се на адаптирано млеко имаат повеќе грчеви отколку оние кои се на доење со мајчино млеко. Оваа состојба на грчеви започнува по втората недела од раѓањето и продолжува се до третиот и четвртиот месец. Инфантилните колики се карактеризираат со болка во стомачето на бебето, а болката е придружена со силен долготраен плач со грчење и триење на ножињата, ги стега прстињата, го свиткува грбот, поцрвенува во лицето, ги повлекува нозете кон градите или ги турка од нив при тоа исфрлувајќи ги гасовите и плачејќи.
Има неколку карактеристики врз основ на кои можеме да го класифицираме плачот на бебето дека е од колики, а тоа се:
- Доколку бебето има помалку од 5 месеци;
- Доколку плаче повеќе од три часа;
- Ако плаче последователно три или повеќе денови во текот на една седмица;
- Доколку плаче три недели во континуитет;
- Ако плачот е најизразен помеѓу 6 часот и полноќ;
- Ако плаче веднаш после хранењето.
Сепак постои и решение за овој проблем, а тоа е употребата на пробиотици. Од сите присутни пробиотици најдобри резултати даваат оние кои се на база на пробиотската култура Lactobacillus reuteri. Најдобри резултати се постигнуваат со давање на оваа пробиотска култура континуирано во тек на четири недели а ефектите се и повеќе од добри, односно ги намалуваат грчевите т.е. плачот на бебињата на помалку од 3 часа севкупно во рамките од еден месец. Поради овој ефект на Lactobacillus reuteri плачењето е двојно намалено во однос на третман со симетикон. Овој тип на пробиотик се наоѓа во форма на капки кои што му овозможува лесен начин на употреба, без хемиски додатоци, што обезбедува сигурен третман без присуство на несакани реакции.
Д-р Светлана Зотовска – специјалист педијатар
