Денес започнува кампањата 16 дена активизам против насилство врз жените
Насилството врз жените е нарушување на човековите права и последица од дискриминација врз жените. Психолошкото насилство е второ најзастапено насилство кај жените во Македонија, а најчести причини за насилството врз жени во Македонија се нарушените семејни односи, економската зависност и злоупотреба на алкохол. Најчест облик на физичко насилство е удрената шлаканица. Задолжително треба да се истакне дека и психичкото малтретирање и омаловажување се форми на насилство.
Дури 35% од жените, на глобално ниво, доживеале некоја форма на физичко и сексуално насилство во животот.
Оваа статистика може да се промени и може да се делува. За таа цел постои „16 дена активизам против насилство врз жените“ – глобална, светска кампања која се одбележува во преку 100 држави низ светот. Кампањата почнува на 25 ноември и завршува 10 декември, на Меѓународниот ден на човекови права.
Датумот 25 ноември е прогласен за Меѓународен ден за борба против насилство врз жените, на првиот состанок на феминистките од Латинска Америка и Карибите, одржан во Богота во 1981 година. Во 1999 година, Обединетите Нации (UN), со резолуцијата 54/134 службено го потврдија овој датум како Меѓународен ден за борба против насилство врз жените.
„Ова е навистина прашање на живот и смрт. Во некои земји, дури 70 проценти од жените пријавиле дека искусиле физичко или сексуално насилство од страна на партнерот“ – нагласи генералниот секретар на Обединетите Нации Бан ки-мун.
Во Македонија во моментов има 5 центри за долготрајно сместување и 1 кризен центар за 48-часовно сместување на жените жртви на насилство и нивните деца. Точната статистика на жени жртви останува непозната, бидејќи голем број од случаите на насилство не се пријавуваат, најмногу заради страв и срам. Исто така, во Македонија постои и Националната Мрежа Против Насилство врз Жените и Семејното Насилство, составена од дваесет граѓански организации кои работат на превенција и борба против насилството врз жените и семејното насилство.
„Степенот до кој насилство е вградено во општеството значи дека искоренувањето е исто така работа за целото општество. Тоа ги вклучува мажите и жените, медиумите и верските заедници. Ние можеме да работиме заедно за решавање на нееднаквоста и предрасудите коишто го овозможуваат и поттикнуваат насилството врз жени и девојки“, изјави г-ѓа Мламбо Нгкука Mlambo-Ngcuka, извршна директорка на ОН Жени (UN Women), која носеше портокалово во знак на поддршка за време на настанот „Обој го светот портокалово“ на кој се најави кампањата, со цел да се соберат парични средства за да се стави крај на насилството врз жените и девојките.
