Дали мајчиното млеко ја губи својата вредност доколку се чува во фрижидер

Безбедно складирање на мајчино млеко

Мајчиното млеко претставува течност која што е толку драгоцена, што често се нарекува бела крв. Постојат многу докази дека мајчиното млеко содржи антиинфективни компоненти кои го градат имунитетот на бебето. Истите тие супстанции, го спречуваат растот на бактерии во него кога е надвор од своето „универзално пакување“. Иако доењето е докажано најдобриот начин за хранење на бебето, сепак постојат многу ситуации кога тоа е не е возможно. Неколку такви ситуации се:

• Недоносено бебе;
• Бебето е во болница и не може да сте присутни за секој подој;
• Одите на работа или треба да сте отсутни од дома заради некоја причина.

Со цел да се зачува хранливиот и антиинфективен квалитет на млекото, исклучително важно е да се знаат некои факти:

• За да се избегне непотребно фрлање на мајчиното млеко, потребно е да се чува во помали садови, 90-120 мл.;
• Млекото кое се чува во фрижидер има повеќе антиинфективни својства од замрзнатото;
• За складирање се користат садови од тврда пластика, стакло со цврст капак или специјално дизајнирани вреќички за таа намена;
• Пластичните садови се подобри од стаклото, бидејќи леукоцитите од млекото се лепат на стаклена површина и со тоа се намалува нивната ефикасност;
• Пред употреба контејнерите за млеко кои ги користите треба да се стерилизирани;
• Загревање на замрзнато млеко се прави откако ќе се одмрзне постепено, во фрижидер во тек на 24 часа, а потоа се става во сад со топла вода и не смее да се загрева директно на рингла или во микробранова печка;
• Мајчиното млеко никогаш не се загрева до вриење, бидејќи ги губи антиинфективните својства;
• Мајчиното млеко не е хомогенизирано и нормално е да се подели на две фази (воден и маслен дел), заради што се препорачува пред употреба садот да се протресе;
• Ако бебето не ја испило целата количина, остатокот треба да се врати во фрижидер и најдобро е да се испие во текот на два часа. Доколку и тогаш не ја испие целата количина, подобро е да се фрли;
• Секогаш кога мајката измолзува млеко, потребно е строго да се придржува кон основната лична хигиена, поточно задолжително миење на раце со сапун и користње на стерилизирани и добро измиени садови за складирање на млекото.