Астигматизмот како рефракциска деформација создава проблем со видот и одблизу и оддалеку
Астигматизам претставува честа деформација на видот причинета од неправилна форма на рожницата или леќата во окото. Кај правилно обликуваното око, овие две очни компоненти имаат заоблена форма како на топка. Всушност, астигматизмот се појавува кога леќата или рожницата на окото наместо кружен, има неправилен, јајчест облик заради кој се менува начинот на кој светлината се прекршува во очната мрежница. Неправилното прекршување на светлосните зраци кај оние што страдаат од астигматизам предизвикува матен и нејасен вид, како искривена слика на предметите што ги гледаат. Астигматизмот, како рефракциска деформација создава проблем со видот и одблизу и оддалеку.
Типови на астигматизам
- Корнеален астигматизам (неправилно обликувана очна рожница);
- Лентикуларен астигматизам (неправилно обликувана очна леќа).
Кои се симптомите и причините за појава на астигматизам
Најчести симптоми за развиен астигматизам се:
- заматен и нејасен вид одблизу и оддалеку, вертикално или хоризонтално;
- уморни очи;
- иритација на очите;
- чести главоболки;
- потешкотии при гледање навечер.
Астигматизмот како деформација на видот може да се појави и кај деца и кај возрасни. Често оваа аномалија се појавува уште од раѓање, но може да се развие и подоцна во животот, некогаш како последица на повреда, заболување или операција на окото. Генетските предиспозиции се исто така влијателен фактор за развивање на оваа деформација, доколку во семејството постои историја на астигматизам или на други очни болести или деформации.
Како се лекува астигматизмот
Постојат два начини на третирање на астигматизам:
Корективни леќи
Корективни и контактни леќи препишани од очниот лекар се најчестиот третман за астигматизмот.
Ортокератологија
Ортокератологијата е медицински третман кој подразбира периодично носење на тврди контактни леќи за привремена корекција на кривината на рожницата или леќата во окото.
Операција
Доколку станува збор за потежок случај на астигматизам, најдобриот третман е хируршки зафат кој вклучува ласерско реобликување на леќата или рожницата во окото што трајно ја лечи оваа деформација. Трите највообичаени оперативни зафати за астигматизам се ЛАСИК метод, ПРК метод и РК метод. Секој од овие зафати носи ризици и можни пост-оперативни компликации како суво око, инфекција, осетливост на светлина и др.
НАПОМЕНА: Секогаш консултирајте се со вашиот очен лекар во случај на проблем со очите или видот.
