Саем на вода за Светскиот ден на водата
Светскиот ден на водата е меѓународна манифестација на UN-Water, кој ја координира работата на ОН за вода и канализација, која што се одржува секоја година на 22 март со многу активности низ целиот свет. Глобалната порака за оваа година се однесува на отпадните води, преку кампањата „Зошто отпадни води?“
Денес на платото пред Домот на АРМ се одржува Саем на вода, каде што на штандовите на домашните производители на пакувана вода, ќе добиете информации за квалитетот на водата што ја произведуваат.
Институтот за јавно здравје на Република Македонија повеќе од десет години го одбележува Светскиот ден на водата во Македонија, со цел да ја подигне свеста кај општата популација за значењето на безбедната вода за пиење за здравјето, како еден од највлијателните фактори за превенирање од болести поврзани со водата. На штандот на Институтот за јавно здравје на денешниот саем, ќе добиете информации за тоа што е безбедна вода, што значи квалитет на вода, каде и како таа се испитува, за безбедноста на водата што ја пиеме, и препораки и совети за значењето на водата за здравјето воопшто.
Една од многуте активности предвидени за Светскиот ден на водата е и анкетата поставена на страницата на Институтот за јавно здравје. Добиените одговори ќе бидат употребени во превентивни цели за подобрување на здравјето.
Целта на одбележувањето на Денот на водата е да се влијае на свеста кај луѓето за намалување на загадувањето а воедно и зголемување на опциите за пречистување на загадените води. Во Македонија, потрошувачката на вода во земјава се проценува дека е нерационална. Неопходни се инвестиции во вода за пиење, одводнување и прочистување на отпадните води.
Загрижувачки податоци за водата и пристапот до вода:
- Околу 85 отсто од светското население нема доволно вода а проценките се дека до 2030 година, 47 отсто од луѓето во светот ќе бидат загрозени поради недостаток на вода;
- Повеќе од 3,6 милиони луѓе секоја година умираат од болести поврзани со водата во нееколошка средина;
- Секој ден 38 работници умираат од болести предизвикани од вода;
- Во Суб-Сахарна Африка жените и девојките секојдневно користат преку 25% од времето за снабдување со вода;
- Повеќе од 1/3 од училиштата во земјите во развој немаат пристап до чиста вода за пиење и за хигиена. Смртните случаи можат да се превенираат со подобра вода и санација.
