Најновото истражување покажува дека консумирањето чоколадо го намалува ризикот од удар и срцеви заболувања
Доколку сте љубител на чоколадо, оваа вест ќе ви го разубави денот. Најновото истражување покажува дека со редовен, но ограничен внес на чоколадо во исхраната, се намалува ризикот од срцеви заболувања и срцев удар. И тоа без оглед дали јадете млечно или црно чоколадо, што е спротивно на досегашното мислење дека само црното чоколадо е здраво за консумирање.
Обемното истражување, кое е плод на повеќе научници, универзитети и болници, траело 12 години и вклучувало 21 илјада возрасни учесници од Англија, докажува дека луѓето кои консумираат 100 грама чоколадо дневно, за 11 проценти го намалуваат ризикот од срцев удар споредено со оние кои не јадат чоколадо, а за 25 проценти го намалуваат ризикот за заболување од кардиоваскуларни болести.
Оние испитаници кои редовно консумирале чоколадо изгледале помлади и биле физички поактивни. И пред да посегнете по чоколадо, важно е да се нагласи дека научниците докажале дека постои поврзаност помеѓу јадењето чоколадо и намалувањето на кардиоваскуларните заболувања, но не и дека чоколадото е директен причинител.
Сепак, чоколадото има мноштво позитивни ефекти врз здравјето, а најважната е присуството на флаваноли. Тие се антиоксиданси кои се наоѓаат во чоколадото, чајот и црвеното вино. Ова најново истражување се приклучува на бројните досегашни истражувања за позитивните придобивки од консумирање чоколадо.
Тие студии досега истражиле дека чоколадото е богат извор на магнезиум, кој е добар за работата на мозокот. Исто така, чоколадото го подобрува имунитетот, го намалува стресот, го намалува крвниот притисок, ги подобрува когнитивните функции, а магнезиумот, исто така, го подобрува и варењето на храната.
Повеќето од овие здравствени придобивки се поврзани со темното чоколадо, бидејќи за 50 проценти содржи повеќе какао од млечното чоколадо. Но кога станува збор за истражување поврзано со кардиоваскуларните заболувања, како што е наведено во најновата студија, не е важно дали се консумира млечно или црно, бидејќи и двата вида имаат позитивен ефект врз работата на срцето. Белото чоколадо воопшто нема антиоксиданси, па затоа не се препорачува како дел од исхраната.
