Луѓето кои имаат нездрави животни навики имаат тешкотии во надминувањето на депресивните епизоди
Депресијата е еден од поголемите здравствени проблеми во светски рамки. Затоа не само лекувањетo, туку и нејзината превенција е многу важна.
Физичкото здравје е важна основа на менталното здравје. Затоа честопати луѓе кои не се физички активни имаат зголемен ризик за развој на психички болести, како што е депресијата. Повеќе студии покажале дека жените кои се физички активни имаат намален ризик за појава на депресија. Препорачливо е физичка активност барем 30 минути дневно.
Луѓето кои имаат нездрави животни навики, исто така, имаат тешкотии во надминувањето на депресивните епизоди. Негативни фактори кои можат да придонесат за депресивни епизоди се: злоупотреба на дрога и алкохол, диети со големо внесување на шеќер, недоволна физичка активност, недоволно спиење, премногу работа.
Здравиот сон е потребен за физичко, емоционално и психичко здравје. Студиите покажуваат дека здравиот сон е еден од начините на кој може да се зголеми ефикасноста на психотерапијата. Недоволното спиење може да биде, исто така, причина за депресија кај адолесцентите. Стресот е, исто така, еден од факторите кој има директно влијание на расположението доведувајќи до иритабилност, проблеми со спиењето и когнитивни промени како нарушена концентрација.
Се покажало дека здравата исхрана, како и намалувањето на телесната тежина може да го намали ризикот од депресија или да ги редуцира нејзините симптоми. Депресивните пациенти честопати се хранат нездраво и имаат намален влез на хранливи материи. Во ваква ситуација се препорачува да се внесува повеќе овошје, зеленчук, житарки, риба и помалку масни производи, со што би се намалил ризикот за депресија. Тоа се објаснува со фактот дека зголеменото внесување на фолна киселина го намалува ризикот за појава на депресија, а зеленчукот, овошјето, житарките и месото се најважни диететски извори на фолати. Спротивно на некои поранешни истражувања, витамин Б 12, незаситени масни киселини, чајот и кафето не се поврзани со депресијата.
Д-р Бранко Аксентиев, специјалист психијатар
