Целта на менталните мапи не е да се создаде само визуелна слика, туку да се создаде визуелен организатор кој ќе даде информации или идеи за една специфична тема за којашто детето се обидува да научи, или да ги организира или развие своите идеи и мисли.
Една стратегија за подучување на децата како да ги организираат своите мисли е преку визуелната техника наречена мапирање на умот. Менталните мапи овозможуваат организaција на мислите преку креација на графички организатор.
Менталните мапи се измислени од светски познатиот експерт за мозокот, меморијата, брзината на читање, креативноста и иновативноста, Тони Бузан. Преку повеќе од 40 години истражување на работата на мозокот, Тони Бузан го посветува својот живот на техники за развивање и рафинирање за да им помогне на поединците да размислуваат подобро и креативно и да го достигнат својот целосен потенцијал.
Зошто менталните мапи се добри за користење?
Менталните мапи овозможуваат активирање на двете страни од мозокот, левата и десната хемисфера. Левата страна на мозокот е одговорна за организација, додека десната страна е одговорна за креативноста. Доколку можеме да ги искористите двете страни од нашиот мозок кога учиме нешто ново или кога развиваме идеи за нешто што е интересно или важно за нас, шансите да го разбереме концептот подобро се многу поголеми ако направиме ментална мапа.
Техниките за мапирање на умот може да се користат од луѓе на сите возрасти кои сакаат да ги организираат своите мисли. Имено, менталните мапи може да ги користат малите деца за учење на основни работи, студентите за спремање испити, како и професионалците за водење на бизнис-состаноци, помали проекти и сл.
Како децата можат да ги користат менталните мапи?
Менталните мапи може да се користат за различни активности и задачи. Без разлика на возраста, децата може да ги користат мапите за поефективно учење со тоа што лекциите ќе си ги претстават преку повеќе слики и зборови во различни бои. Исто така, додека се на училиште и слушаат предавање од наставникот или професорот, може да креираат мапа за подобро помнење на важните работи од новата лекција. Меѓудругото, менталните мапи може да се користат и во тим за спремање на училишен проект или, пак, презентација. На овој начин, сите што учествуваат во проектот ќе придонесат во подобро претставување на концептите што подоцна ќе треба бидат пренесени на целиот клас.
Менталните мапи може да најдат примена за многу предмети што ги изучуваат децата. Мапирањето на умот може, исто така, да помогне во подготовка на домашните задачи, на пример, изработка на извештај за книга кој потоа би го олеснил прераскажувањето на истата. Потоа, при изучување и обработка на пообемни теми, како што се важни историски настани како Првата и Втората светска војна, мапата може да го олесни идентификувањето на клучни работи што се случувале. Едноставна ментална мапа може да биде од корист дури и за најмалите коишто допрва ќе ги учат животните, овошјето или зеленчукот. На пример, родителите може да креираат мапа за секое животно, овошка или зеленчук која ќе ги содржи деталите и фактите за истото и потоа ќе го подучува детето.
Целта на менталните мапи не е да се создаде само визуелна слика, туку да се создаде визуелен организатор кој ќе даде информации или идеи за една специфична тема за којашто детето се обидува да научи, или да ги организира или развие своите идеи и мисли. Оттука, визуелниот изглед на мапите не е толку важен, бидејќи фокусот треба да биде на тоа како ќе се организираат мислите.
