Неколку корисни совети како да го одржите психофизичкото здравје за време на испитната сесија
За време на испитните сесии, студентите најчесто не водат многу сметка за здравјето. Периодот кога се спремаат за испит и полагаат најчесто не спијат цели ноќи, јадат неквалитетна брза и високопроцесирана храна (ако воопшто јадат), „преживуваат“ со големи количини кафе, никотин, енергетски пијалаци, па дури и апчиња за смирување, што е погрешно. Многу од студентите и покрај тоа што можат да најдат барем малку слободно време за физички активности и други активности за ослободување од стрес, сепак совеста не им дозволува да излезат од дома и да започнат да вежбаат.
Вистината е една – со запоставувањето на здравиот начин на живот, се додава уште повеќе стрес врз телото и умот.
Постојат неколку едноставни навики што можат студентите да започнат да ги применуваат, но и сите луѓе што поминуваат низ стресни периоди. Физичката активност не само што ќе ви помогне да симнете неколку несакани килограми, туку всушност може и да го подобри квалитетот на учењето и ефикасноста за време на испитот. Студентка по медицина во Кардиф и блогерката за фитнес и здравје Хејзел Волес (Hazel Wallace), истакнува дека треба да се концентрираме на умот и телото за да го надминеме стресот од испитите. Еве неколку од нејзините совети.
Испотете го стресот
Доколку живеете не многу далеку од вашиот факултет, обидете се како превозно средство да ги користите своите стапала. Пешачете повеќе, џогирајте или возете велосипед. На овој начин ќе го заштедите непотребно изгубеното време во барање на паркинг простор за автомобилот. Кога сте под стрес најчесто слабее имунитетот, па велосипедот е идеален за негово зајакнување. Исто така, на овој начин избегнувате непотребен контакт со потенцијални бактерии и вируси од градскиот јавен превоз кои може да се за вас опасни во овој период. Не заборавајте и дека во периодот на испитната сесија потребна ви е поддршката од пријателите. За да не го трошите времето на излегување на кафе, со пријателите можете да одите заедно да вежбате. Хејзел како вежба којашто е идеална за телото и умот, ја препорачува јогата затоа што ослободува ендорфини и развеселува.
Храна за мозокот
Кафето го пиеме за да бидеме будни, но премногу кафе штети да се фокусирате. Не претерувајте со кафето, бидејќи може да предизвика главоболки, анксиозност, слаба концентрација и нарушување на сонот. Препорачливо е да пиете повеќе чаеви и свежи овошни сокови или овошна вода. Постојат многу начини како да се наполните со енергија наместо да пиете вештачки витамински коктели.
За да можете да впивате информации и мозокот да ви е во добра форма, барем за време на испитната сесија избегнувајте да пиете алкохол, за да се будите свежи наутро.
На мозокот му требаат Омега 3 и Омега 6 за да функционира оптимално. Овие здрави масти претставуваат есенцијална компонента од мембраните на нервните клетки. Јадете повеќе семки, јаткасти плодови, мрсни риби. Како ужинка најдобро е да одберете овошје, свеж зеленчук, свежи пуканки и јатки. Овие продукти се многу хранливи. Хејзел вели да се избегнуваат процесирани „здрави“ ужинки, како што се мусли плочките, затоа што тие содржат многу шеќер и масти.
Не грижете се доколку не положите, бидејќи така уште повеќе си товарите стрес на сопствениот грб. Исто така, доколку започнете да се јадосувате дека губите време со тоа што не сте успеале да положите навреме, бидејќи можете дури и да се разболите, затоа што многу болести се темелат врз емоционална основа.
