Една од главните придобивки од вежбањето кај луѓето со Паркинсонова болест е подобро справување со симптомите на болеста.
Вежбањето е неопходен дел од секојдневниот живот на сите кои сакаат да го одржуваат своето здравје и физичка форма. Меѓутоа, за луѓето кои боледуваат од Паркинсонова болест, вежбањето е повеќе. За нив секојдневното правењето на вистинските вежби може да им помогне да ги одржат виталните аспекти на секојдневниот живот, како што се мобилноста и одржувањето на рамнотежата.
Зошто вежбањето им користи на луѓето со Паркинсонова болест и како влијае на нивниот мозок? Од Фондацијата „Parkinson’s“ истакнуваат дека сè повеќе податоци покажуваат постојат краткорочни и долгорочни придобивки од вежбањето за лицата со Паркинсонова болест.
Една студија водена под името „Parkinson’s Outcomes Project“ од истата организација, откри дека кај луѓето со Паркинсонова болест кои вежбале најмалку 2 и пол часа неделно, се забележало побавно губење на мобилноста и квалитетот на животот од оние коишто не вежбале.
Една од главните придобивки од вежбањето кај луѓето со Паркинсонова болест е подобрувањето на симптомите на болеста. Ова вклучува подобрување на:
- Движењето;
- Рамнотежата;
- Треперењата;
- Флексибилноста;
- Моторната координација;
- Држење на телото;
- Вкочанетоста.
Влијание на вежбањето на менталното здравје
Редовното вежбање освен што го подобрува физичкото здравје на луѓето со Паркинсонова болест, помага и во подобрувањето на нивното ментално здравје. Имено, повеќе истражувања покажале дека вежбањето помага во ублажување на симптомите на замор и во подобрувањето на расположението и спиењето.
Допаминот е невротрансмитер кој ги контролира центрите за награда и задоволство во мозокот, како и го регулира движењето и емоционалниот одговор. Кај луѓето со Паркинсонова болест е карактеристичен недостигот на допамин. Додека вежбањето не покажало дека го зголемува количеството на допамин во мозокот, различни истражувања покажуваат дека тоа помага да се користи поефикасно.
Типови на вежби
Типот на вежби што луѓето кои боледуваат од Паркинсонова болест треба да ги практикуваат вообичаено зависат од тоа со какви симптоми се соочуваат и колку истите ги ограничуваат во извршување на одредени активности. Сепак, генерално луѓето со Паркинсонова болест треба да се фокусираат на три типови на вежби:
- за флексибилност и истегнување;
- аеробени или кардио-вежби;
- за отпор или користење на мускулите против спротивставената сила.
Постојат многу различни видови на вежби кои ги вклучуваат сите три од овие области. Овие вежби вклучуваат
- Таи чи;
- Јога;
- Велосипедизам;
- Трчање;
- Пилатес;
- Танцување.
Се покажа дека типот на вежба познат како „random practice“ е од особена корист за луѓето со Паркинсонова болест. Ова е аеробна вежба која подразбира менување на брзината, активноста или насоката.
Совети
Пред да се започне со било каква физичка активност или засебни вежби, луѓето со Паркинсонова болест треба да ја осигураат својата безбедност. Неопходно е да се разговара со својот невролог, доктор и физиотерапевт за тоа што ќе биде најдобро за нив индивидуално. Откако ќе се започне со вежбање важно е да се задржи конзистентноста и да се вежба редовно.
