Трчањето со бебешката количка е здрав избор кога станува збор за вас и вашето бебе
Многумина кога ќе станат родители забораваат на одржувањето на своето здравје и физичка форма. Доколку се пронаоѓате во оваа група на луѓе коишто сметаат дека немаат доволно време да се посветат на себе и постојано го наоѓаат причини и изговори да го одложува вежбањето и трчањето заради своето дете, спремете се тоа да го промените.
Џогирањето е практичен и ефективен тренинг во секое време и на секоја возраст, без разлика дали сте родител или не. Еден понов тренд што полека станува секојдневна рутина кај младите родители е трчањето во друштво на бебешката количка. Трчањето со бебешката количка е здрав избор и кога станува збор за вас и вашето бебе. Можеби ви звучи неизводливо, но џогирањето со со бебешката количка без сомнение ќе влијае позитивно на вас и на вашето дете. Кога станува збор за дозволената возраст на вашето дете, се препорачува децата да бидат на возраст најмалку од 6 до 9 месеци – период во кој бебето веќе е способно да седи и да држи својата глава.
Како да се подготвите за трчање со вашето дете
Одберете широки патеки
Изборот на широка патека е важен кога станува збор за џогирање со вашето бебе. Не трчајте на тесни патеки каде што може да наидете на многу велосипедисти и џогери со кои разминувањето би ви претставувало потешкотија. Ударните часови во коишто многумина трчаат и вежбаат во парковите и на кејовите не се препорачливи.
Избегнувајте ги удолнините и угорнините
Рамната патека е второто нешто на коешто треба да внимавате кога го бирате просторот на којшто ќе трчате со вашето бебе во количка. Држете се подалеку од угорнините и удолнините кои воопшто не се практични кога станува збор трчање и истовремено туркање количка на тркала.
Одберете го правилниот час за трчање
Освен што треба да ги избегнете ударните часови кога парковите и кејовите се преполни со велосипедисти и џогери, треба да внимавате и на часовите кога станува збор секојдневниот распоред на вашето дете. Не трчајте во периодите во кои вообичаено вашето бебе треба да јаде, напротив, внимавајте стомакот на бебето да биде полн за да може да трчате слободно.
Не слушајте музика на слушалки
Џогирањето со вашето бебе, слушајќи гласно музика со слушалки несомнено е лош избор. Без разлика на возраста на вашето дете, плачењето е многу вообичаено во секој момент, па и додека трчате. Оттука, треба да избегнувате да слушате музика на слушалки за да бидете во тек со она што се случува околу вас. Доколку сте од оние типови на џогери што не можат да трчаат без музика, набавете си мал безжичен звучник што ќе можете да го поврзете со мобилниот уред. Звучникот е практично решение бидејќи без проблем ќе може да го сместите во некоја од преградите на количката.
Не заборавајте на облеката за вашето дете
Пред да се подготвите себеси за трчањето, не заборавајте соодветно да го облечете вашето дете. Не ги следете правилата што важат за вас бидејќи вие со сигурно ќе се загреете и ќе се испотите повеќе од вашето дете. Облечете го детето потопло од што вообичаено би го облекле на конкретната температура и не заборавајте да понесете со себе резервна облека.
